Ximo Lizana, en «Educación século XXI» na Sede Afundación Afundación A Coruña e Afundación TV

08.03.2022. A Sede Afundación da Coruña e Afundación TV acollerán o vindeiro xoves 10 de marzo, ás 19.00 h, a conferencia de Ximo Lizana, «Ao futuro non se vai, créase» no marco do ciclo «Educación século XXI». En Afundación TV, a conferencia poderase seguir desde aquí e para asistencia presencial, o formulario de inscrición está aquí. Profesor e investigador da Universidad Europea, ex director artístico de ARCO e Premio Nacional (AECA) de arte contemporánea en España e Alemaña, será o encargado de realizar unha análise do contexto actual relativo á transformación dixital desde a óptica da intelixencia artificial, a súa especialidade, a ciberseguridade. Unha proposta que presenta desde a perspectiva da súa traxectoria persoal, que comezou no mundo da creación artística dixital vinculada á robótica e aos hologramas ata chegar ao seu labor actual como CEO de NxtFluencers e especialista en Branded Content tecnolóxico, que centra os seus esforzos no asesoramento para manter unha boa reputación das persoas no mundo dixital, o que coñecemos hoxe como a pegada dixital das persoas na rede. Así mesmo, o propio Lizana afirma, e así o abordará na súa conferencia, que o seu traballo consiste en axudar a inspirar e xestionar un diálogo fluído entre persoas, corporacións e institucións, proporcionando ideas estratéxicas para navegar na intersección dos mercados globais e a tecnoloxía dixital.

Este evento enmárcase na iniciativa solidaria de apoio a Ucraína no marco do proxecto «Cultura por alimentos» que, a raíz do drama humanitario que se vive neste país, se implica tamén coas persoas refuxiadas e a súa cidadanía. Afundación invita os asistentes ao acto a que, seguindo as recomendacións das entidades que están a traballar sobre o terreo, entreguen prioritariamente alimentos precociñados e latas de conserva, alimentos infantís, produtos hixiénico-sanitarios infantís e femininos e medicamentos e material de primeiros auxilios, que poderán depositar á entrada do recinto nos colectores dispostos para este fin. O acceso á conferencia será a cambio da entrega dalgún destes produtos.

«Educación século XXI»

A necesidade de consolidar un marco de educación asentado en valores éticos e de comprensión e apoio recíproco de toda a comunidade educativa é un dos principios que se seguen nas actividades didácticas desenvolvidas en Afundación. «Educación século XXI» de Afundación, a Obra Social de ABANCA, é un programa no que se quere destacar a importancia dunha educación asentada en valores no que docentes, nenas e nenos e as súas familias poidan coñecer técnicas, mecanismos e estratexias que favorezan a convivencia no contorno escolar para a consolidación dunha sociedade cohesiva e solidaria na que a igualdade e o respecto sexan os alicerces das relacións interpersoais.

Os contidos están accesibles tamén en diferido e difúndense a través das RRSS da Obra Social de ABANCA, co obxectivo de que estean ao alcance de toda a poboación, provéndoa, así, de ferramentas que contribúan a mellorar a nosa sociedade no seu conxunto.

Toda a información da actividade de Afundación, na nosa SALA DE PRENSA.