Wu Wei, intérprete de sheng, chega á Tempada de Clásica de Afundación acompañando á Real Filharmonía de Galicia
O solista chinés Wu Wei, que percorre o planeta como solista coas mellores orquestras tocando un instrumento milenario; obras de Igor Stravinsky e de dous autores novísimos; e a Real Filharmonía de Galicia (RFG). Velaquí a proposta para o vindeiro concerto da tempada de abono de música clásica de Afundación en Vigo. A cita será o vindeiro mércores, día 17 de abril, no Teatro Afundación. As entradas están practicamente esgotadas. As poucas dispoñibles poden obterse en Ataquilla.com.
A sesión musical será a quinta das programadas neste primeiro semestre do ano na tempada de abono da Obra Social de ABANCA en Vigo. E a cuarta das cinco que ofrecerá a RFG en Vigo no mesmo período. Á fronte da formación musical con sede en Compostela estará o seu director titular, Baldur Brönnimann.
Os sons milenarios do sheng
O sheng é un instrumento tradicional de vento de son cálido e suave. Podería ter, segundo algúns especialistas, ata cinco mil anos de antigüidade. Recoñecido coma antecedente de instrumentos coma o acordeón, continúa estando vixente na música orquestral en China. E o seu intérprete máis destacado é o solista Wu Wei (China, 1970).
No concerto do vindeiro día 17, a RFG e Wu Wei interpretarán un programa no que a música de Igor Stravinsky dialogará con senllas composicións dos novísimos autores Huang Ruo (1976, Hainan China) e máis Itziar Viloria (Barcelona, 1977).
Últimos concertos da Tempada de Clásica
A velada musical coa RFG e Wu Wei será a quinta das 8 programadas neste primeiro semestre na tempada de abono de Afundación en Vigo. En maio, o público poderá desfrutar de tres concertos.
O Coro da Fundación Princesa de Asturias chegará ao Teatro Afundación o 2 de maio para interpretar músicas dos repertorios clásico e popular. Xa o día 23, a Real Filharmonía de Galicia volverá encontrarse co público de Vigo con Herdanza Africana, un concerto no que soarán as composicións de tres autoras contemporáneas: a británica Hannah Kendall, a estadounidense Missy Mazzoli, e a afroamericana Florence Prince. A Sinfónica de Galicia, dirixida por Juanjo Mena e acompañada polo solista de viola Joaquín Riquelme, pecha o 30 de maio esta primeira parte da tempada de abono en 2024. Interpretará composicións de Ibéla Bartók e de Johan Halvorsen.
A Tempada de Clásica de Afundación é parte do programa solidario «Cultura por alimentos». Os asistentes aos concertos poderán colaborar depositando alimentos non perecedoiros nos colectores habilitados para tal fin no Teatro Afundación. As doazóns serán repartidas entre persoas e familias vulnerables da cidade olívica e a súa área de influencia. «Cultura por alimentos» é un programa desenvolto pola Obra Social de ABANCA en colaboración coa Federación Española de Bancos de Alimentos.
Imaxe de Wu Wei interpretando o sheng, dispoñible AQUÍ.