Un Teatro Afundación cheo recibirá o vindeiro venres, día 4, o espectáculo musical e comedia sobre Friends

Cando o venres 4 de outubro ás 20.30 horas comece no Teatro Afundación de Vigo o espectáculo Friends, the musical parody, o patio de butacas e os anfiteatros estarán, moi probablemente, cheos por completo. Apenas quedan xa entradas en Ataquilla.com para asistir ao musical, tamén cargado de comedia e que devolve aos escenarios os lendarios personaxes da serie televisiva Friends. Xusto cando se cumpren 30 anos da estrea da teleserie nos Estados Unidos, os seus personaxes e as súas tramas seguen a ser un referente para varias xeracións. O espectáculo que poderá ver o público do Teatro Afundación é unha versión da proposta homónima que leva anos triunfando nos teatros de Broadway, en Nova York, coñecidos pola súa oferta e calidade en materia de musicais.

Friends, the musical parody recupera para a súa trama os personaxes orixinais. E tamén os momentos máis lembrados das dez tempadas que durou a serie. Dirixe o espectáculo José Saiz. Conforman o elenco María Ruiz (Rachel), Omar Ruiz (Ross), María Ochando (Mónica), Dani Saiz (Chandler), Irina Bargues (Phoebe) e Ricardo Saiz (Joey).

O espectáculo, que apela tanto ao humor coma aos sentimentos, tamén está sendo representado en países coma Reino Unido e Australia.

Máis música

O Teatro Afundación Vigo programa este outono 4 concertos de clásica e 7 musicais e concertos de música popular. No caso destes últimos, a primeira cita será este domingo co tributo a Michael Jackson Michael’s Legacy, o 29 de setembro. Logo chega Friend’s: the musical parody. Antes de que acabe o ano será a quenda dos tributos aos grupos Queen, Los Brincos e Los Secretos. A Obra Social de ABANCA tamén programa concertos de Amancio Prada, o 17 de novembro, e de Carlos Núñez, que volve un decembro máis ―o día 23― ao Teatro Afundación.

Imaxes dispoñibles nesta ligazón.