Un outono de directos culturais e formativos en Afundación TV
22.12.2020. Afundación TV reforzou a súa programación en directo deseñada para os meses de outono. O calendario de emisións caracterizouse por contar cunha intensa proposta de actividades nas que, figuras xa internacionalmente recoñecidas e novos valores, impulsaron a dinamización da cultura e a formación a través desta plataforma online. «Educación século XXI», «Diálogos con Pepe Solla. Achegándonos a…», «Falamos de ciencia», «Programación de teatro para escolares», «Programa de educación financeira», as masterclasses e live sessions de IESIDE sen muros ou o Festival IKFEM, con Ainhoa Arteta, son algúns exemplos dos eventos que estiveron á disposición das case 30 000 persoas que se inscribiron nestas actividades a través de Afundación TV.
As imaxes están dispoñibles nesta ligazón: https://drive.google.com/drive/folders/1mTtqmKWix4YQpgfTzL7NiG4SKlKcFosv?usp=sharing.
Unha proposta de vocación internacional
Case 30 000 persoas seguiron os directos de Afundación TV na programación de outono. Nuns meses nos que as restricións de mobilidade se mantiveron a nivel global, a Obra Social de ABANCA, desde a súa vocación intercultural e internacional promovida tamén desde Afundación TV, conseguiu superar barreiras e conectar públicos procedentes de moi diversos puntos do planeta. As propostas do equipo da Obra Social de ABANCA, de acceso libre e gratuíto, viñéronse seguindo ao longo deste ano desde máis de 100 países.
Educación, cultura e formación
As propostas de Afundación TV ao longo destes meses de outono incluíron eventos tan relevantes e tan seguidos polo público como o coloquio con Santiago Segura, Asier Mensuro e David Rubín, en torno ao cómic e ás creacións deste último; os concertos do festival IKFEM, cunha entrevista coloquio coa cantante de ópera Ainhoa Arteta e o seu posterior concerto desde o Teatro Municipal de Tui; live session de IESIDE desde Nova York co profesor Roberto Álvarez del Blanco da New York University; o ciclo «Educación século XXI» con César Bona, Javier Urra, Víctor Arufe e Anna Sans; os campamentos infantís e xuvenís online con actividades en directo de teatro, música, e produción e composición musical; mes do medio ambiente e os océanos, coa participación de reputados científicos de institucións como o CSIC nos coloquios organizados; celebración do Día da Educación Financeira con Carlos Ocaña, director xeral de Funcas; adaptación das actividades escolares de Afundación ao formato online, con representacións de obras de teatro en directo desde o Teatro Afundación de Vigo; as entregas en directo do Premio de Poesía Afundación e do Premio Afundación de Xornalismo Francisco Fernández del Riego; ou as masterclasses de IESIDE sobre ciberseguridade, intelixencia artificial, e economía no contexto actual COVID-19.
Toda a información da actividade de Afundación, na nosa SALA DE PRENSA.