A programación de actividades para escolares de Afundación leva a Vigo o espectáculo 'Circopeta'

Afundación continúa desenvolvendo as actividades propostas na súa programación para escolares deste curso académico. Nesta ocasión, o grupo Odaiko Percussión Group sairá á escena no Auditorio do Teatro Afundación de Vigo (Policarpo Sanz, 13) co seu espectáculo de clown, gags e música Circopeta.

As representacións serán os días 11, 12, 13, 14 e 15 de decembro con dúas sesións diarias, ás 10.00 h e ás 12.00 h.

Máis de 4200 alumnas e alumnos de 1.º e 2.º curso de educación primaria de 78 centros escolares de Vigo e proximidades acudirán a ver esta proposta musical en galego.

CIRCOPETA, DE ODAIKO PERCUSSION GROUP

Odaiko Percussion Group sérvese de instrumentos da vida cotiá, sonoros tambores de plástico reciclados, ritmos acompañados de coreografías, melodías de instrumentos de láminas e unha interacción poderosa coa audiencia para facer deste peculiar circo un medio de expresión afastado da abafante tecnoloxía e próximo ás inquietudes dos máis pequenos.

A proposta enmárcase dentro das actividades educativas para escolares programadas para o curso 2017 – 2018 que teñen como obxectivo reforzar a formación extracurricular que os estudantes reciben nas súas aulas. Así, a programación deseñada por Afundación promove unha educación en competencias transversais que potencian nos estudantes o talento, a autonomía, a solidariedade, a creatividade, a autoestima ou o traballo en equipo.