Afundación presenta os «Sábados musicais» para os máis pequenos no marco da mostra «Sonoro empeño»
Afundación, a Obra Social de ABANCA, continúa presentando as súas propostas lúdico-educativas vinculadas á exposición «Sonoro empeño. A música nas coleccións ABANCA e Afundación». Nesta ocasión presenta o ciclo de actividades «Sábados musicais» dirixidos a nenas e nenos de entre 4 e 9 anos. Desenvolveranse todos os sábados do mes de febreiro, de 11.30 a 13.00 h, na Sede Afundación da Coruña (Cantón Grande, 8) e para participar é necesario anotarse en areaeducativacoruna@afundacion.org ou no teléfono 981 185 060.
A exposición «Sonoro empeño. A música nas coleccións ABANCA e Afundación», que ilustra a relación entre as artes plásticas e a música, pódese visitar ata o vindeiro 2 de marzo na Sede Afundación da Coruña.
SÁBADOS MUSICALES EN AFUNDACIÓN
O primeiro taller, «Os fíos prodixiosos da música», celebrarase o sábado 2 de febreiro. Consistirá na audición e visionado de obras relacionadas cos instrumentos de corda. Os asistentes poderán coñecer curiosos instrumentos de corda que xamais imaxinarían que o son, e no taller fabricarán o seu propio instrumento: unha caixa de son con corda tensada para poder facer soar uns acordes.
En «Aporrear con sentido tamén é música» os instrumentos de percusión serán os protagonistas. Audicións, pintura e creatividade para construír un auténtico tambor co que poder gozar.
O seguinte sábado tocaralles a quenda aos instrumentos de vento no taller «O vento que se desliza produce música», con frautas, trompetas e trombóns. Ademais, os participantes construirán unha frauta máxica.
O programa rematará con «Pentagramas máxicos» dedicado ás orquestras, os dúos, os conxuntos e os grupos musicais.
«SONORO EMPEÑO»: ACTIVIDADES PARALELAS
As propostas que se desenvolverán nos vindeiros meses no marco da exposición «Sonoro empeño. A música nas coleccións ABANCA e Afundación» abarcan, entre outros, concertos, intervencións artísticas, talleres de reciclaxe de instrumentos musicais, mesas redondas, animación na rúa, performances e pasacalles. As actividades, que aplicarán novas tecnoloxías e incluirán tamén accións interactivas e concursos, faranse en distintos espazos da Sede Afundación da Coruña e tamén no exterior do edificio.
A propia sala de exposicións acollerá paseos musicais, concertos, intervencións poético-musicais, nos que participarán, entre outros, a gañadora do Premio de Poesía Afundación, Estíbaliz Espinosa, ou os integrantes de ABANCA ReSuena, quen protagonizou o día da apertura da mostra un concerto inaugural.
A mostra pódese visitar así mesmo de forma virtual, cunha perspectiva 360, AQUÍ e as obras poden verse en realidade aumentada a través da App da Colección de Arte ABANCA.