Retiran máis dunha tonelada de invasoras das dunas de Area da Cruz nunha limpeza organizada por Afundación
Máis de 60 estudantes de ensino secundario do IES As Bizocas do Grove participaron na mañá de hoxe nunha intensa xornada de voluntariado ambiental focalizada na retirada de diferentes especies exóticas invasoras das dunas da praia grovense de Area da Cruz, fundamentalmente Carpobrotus edulis, coñecida popularmente como unlla de gato ou herba do coitelo, e a glicina chinesa Wisteria sinensis, unha especie vexetal gabeadora que se está a estender de xeito invasivo pola duna cun comportamento pouco habitual nesta especie, a rentes do chan, e sobre a que as persoas voluntarias de Actúa, o programa de voluntariado de Afundación, xa actuaran a finais da primavera pasada no marco de PLANCTON, retirando daquela máis de 350 quilos.
Os traballos na duna desenvolvéronse durante toda a mañá e, ao final de xornada, foi máis dunha tonelada o que se conseguiu retirar deste lugar tan sensible, que aos poucos, e grazas a iniciativas coma a de hoxe, semella que vai recuperando os valores naturais que atesoura, e no que as especies halófilas que precisan elevados niveis da sal nos solos, atopan un lugar privilexiado para vivir, entre elas, diferentes euforbias, o cardo da ribeira Eryngium maritimm, a cebola das gaivotas Pancratium maritimum, ou o alelí das praias por citar algunhas. Tamén se retiraron 21 kg de lixo mariño.
Do mesmo xeito que ocorrera hai cinco meses, a actividade contou coa colaboración do Concello do Grove, quen facilitou sacos para a recollida e ferramentas, ademais de encargarse da ulterior xestión das plantas exóticas invasoras retiradas do lugar.
Tras a xornada de hoxe en Area da Cruz, son xa máis de 12 as toneladas de flora exótica invasora retiradas no marco de PLANCTON, o Plan de Conservación Territorial impulsado por Afundación que con este tipo de actuacións, e con outras como as limpezas de lixo mariño, nas que xa leva retiradas 81 toneladas, procura fomentar a conservación e a sostibilidade das actividades realizadas na costa e no mar, especialmente na área de influencia das Zonas de Especial Protección para as Aves de ámbito mariño de Galicia, Rede Natura 2000, tratando de inculcar una conciencia sostible en todos os sectores sociais da comunidade.
As imaxes da xornada están dispoñibles aquí.