Protagonistas da emigración galega relatan a escolares a historia detrás das fotos da mostra «Nós tamén fomos emigrantes»

Sara López Mondelo, que emigrou a Australia en 1963; Fernando Fernández Losada, que tivo como destino Alemaña en 1964; e Rosa Valcárcel Martínez, que emigrou ao Reino Unido en 1970 contaron hoxe a escolares de Monforte as historias que están detrás das fotos que conforman a exposición «Nós tamén fomos emigrantes. Fotografías da Axencia EFE sobre a emigración española no século XX». A iniciativa é parte do programa «O valor da experiencia», de Afundación, que ten como obxectivo ampliar as posibilidades de participación e contribución das persoas maiores á colectividade, aproveitando o seu talento e coñecementos vitais e profesionais.

A mostra é parte do proxecto «Corrente cultural», que impulsa a capilaridade da cultura en Galicia, ampliando as propostas alén das sedes de Afundación e ABANCA e que nesta ocasión se desenvolve en colaboración co Concello de Monforte. Na inauguración e visita guiada estiveron, ademais das persoas voluntarias do Espazo +60 Afundación de Monforte e os escolares do CPR Plurilingüe Fundación Educativa Torre de Lemos, o alcalde José Tomé Roca; a coordinadora do Espazo+ 60 de Monforte, Carlota Álvarez- González; o coordinador de Banca Institucional de ABANCA en Lugo, Óscar Rodríguez e a responsable de Relacións Institucionais de Afundación en Lugo e Ourense, Beatriz Fernández-Anguiano.

Os protagonistas

Sara López Mondelo emigrou a Australia en 1963 Pola súa curmá enterárase de que o goberno pagaba os billetes ás «señoritas españolas» que tivesen entre 21 e 36 anos, coa condición de que quedaran durante dous anos no país. A motivación do goberno australiano era que, como en anos anteriores, chegaran moitos homes españois solteiros, podería haber así máis oportunidades para que tiveran descendencia e medrara a poboación do país. Esta emigración feminina a Australia é o que se coñece como Plan Marta (1960-1963 ).

Fernando Fernández Losada emigrou a Alemaña en 1964 cos seus irmáns xemelgos, para a reunificación familiar, seis anos despois de que marcharan seus pais. Tiña 7 anos. Saíu sen saber alemán e acabou aprendendo tres idiomas. A integración na escola, e no barrio en xeral, foi moi boa; os españois eran benvidos en Alemaña. Retornou en 1974.

Rosa Valcárcel Martínez emigrou ao Reino Unido en 1970, de onde retornou en 2021. Tiña 16 anos. Alí vivía xa a súa irmá, o que lle permitiu estender a súa estadía no país ata ter os 17 anos que se esixían para traballar. Tras varias ocupacións temporais, empezou a traballar na gardería que puxera en marcha o goberno español para fillos de españois, onde estaba a súa propia filla. Alí estivo 22 anos ata que en 2003 empezou a traballar no Ministerio de Traballo, en Londres. Retornou en 2021, ao xubilarse.

A exposición

exposición «Nós tamén fomos emigrantes. Fotografías da Axencia EFE sobre a emigración española no século XX» recolle unha selección de corenta fotografías da emigración, tanto española como galega, procedentes dos arquivos da Axencia EFE. O obxectivo é tratar de achegarnos a esa realidade histórica a través dunha síntese fotográfica das migracións mediante a mirada profesional e humana dos fotoxornalistas da época. É a historia de «millóns de españois que tiveron que abandonar a súa terra para sobrevivir», en palabras de Miguel Ángel Gozalo, director da Axencia EFE entre 1996 e 2004.

Poderá visitarse no Espazo+ 60 de Afundación en Monforte ata o 20 de maio, período no que as persoas voluntarias, monfortinas e protagonistas deste período histórico, compartirán co alumnado dos centros educativos da contorna a súa experiencia na emigración a través de visitas guiadas.

Imaxes do encontro e historias de vida das persoas voluntarias do programa «Fálame da emigración», dispoñibles AQUÍ.