Afundación programa no seu Auditorio de Pontevedra un espectáculo cada semana entre setembro e decembro
Un total de 18 espectáculos conforman a programación do Auditorio Afundación de Pontevedra para os últimos meses do ano. A proposta da Obra Social de ABANCA para o seu Auditorio en Pontevedra chega cargada de humor: son monólogos ou comedias as seis propostas teatrais para o período. Os actores galegos Josito Porto e David Amor inauguran a tempada coa obra Go Home o 20 de setembro. Desde entón, e ata que chegue o Nadal, haberá polo menos un espectáculo por semana. A tempada termina o 21 de decembro coa música de Remember Queen, un concerto tributo á lendaria banda británica de rock liderada por Freddy Mercury. Entre ambas as citas haberá, ademais, outras 5 obras de teatro, 4 musicais, 3 concertos, 2 espectáculos a cargo do ucraíno Ballet de Kiev, e 2 galas de ilusionismo. As entradas están xa dispoñibles en Ataquilla.com.
Josito Porto e David Amor, populares tamén polos seus traballos para o cinema e a televisión, subiranse ao escenario do Auditorio Afundación a poucas horas do final oficial do verán: ás 9 da noite do 20 de setembro. E convidarán o público, nun espectáculo en clave de comedia negra, a reflexionar sobre un asunto que está de candente actualidade: o turismo de masas e os seus impactos. Go Home conta as peripecias dun viaxeiro incansable que de modo casual chega ao Cebreiro e atopa alguén da zona con quen vive unha complicada experiencia.
Unha semana despois, o día 27 de setembro, comezan os musicais. O primeiro será unha homenaxe ao Rei do Pop, Michael Jackson. O seu título é Michael's Legacy e o club de fans españois do compositor e cantante considérao o mellor show de música en vivo sobre Jackson. O seguinte musical, o 5 de outubro, volve sobre outro referente clásico da cultura urbana das últimas décadas: Friends. The musical parody, construído a partir da serie de televisión dos anos noventa da que toma o seu nome. O musical dos 80s e 90s II rumbo aos 2000 ―segunda parte―, tamén en outubro, e Un conto de Nadal ―14 de decembro― tamén reunirán sobre o escenario grandes elencos para interpretar e cantar grandes historias.
Ballet con causa: Ucraína
Desde Ucraína chega, en dobre cita, o Ballet de Kiev. Presentará dous espectáculos imprescindibles cada ano en boa parte das cidades europeas. Trátase dos ballets de Chaikovski O lago dos cisnes e O crebanoces. O Ballet de Kiev mantén a súa sede na capital de Ucraína. As súas actuacións teñen, ademais, un compoñente benéfico. Un euro do valor total de cada entrada será doado a Unicef para apoiar o seu traballo en Ucraína.
Teatro, concertos e maxia
Mistery Class, de Goyo Jiménez ―18 de outubro―, Feito á man, de Pantomima Full ―19 de outubro―, Acabouse. O meu último espectáculo, de Moncho Borrajo ―16 de novembro―, e Esfínter ―28 de decembro― completan a relación de monólogos e stand up comedies que conforman a programación nos últimos meses do ano.
Polo escenario do Auditorio Afundación, e cun elenco liderado pola actriz María Luisa Merlo, pasará tamén, o 8 de novembro, a comedia teatral Mentiras intelixentes.
Os 3 concertos programados celebraranse entre o 22 de novembro, co cantautor Ismael Serrano, e o 5 de decembro, no que a agrupación Conductores Suicidas presenta o seu Tributo a Joaquín Sabina. Entre ambas as citas, o 30 de novembro, a banda Im-pulse subirase ao escenario do Auditorio Afundación en Pontevedra tamén para homenaxear a outra das grandes bandas de rock da historia, Pink Floyd.
Haberá, ademais, dúas citas coa maxia. Trátase da Gran Gala Internacional Galicia Ilusiona, o 6 de outubro, e da oitava edición do Galicia Magic Fest, os días 21 e 22 de decembro e cun claro acento local: o festival, que aproxima á comunidade autónoma os mellores ilusionistas do mundo, promóveo Pedro Volta.
Imaxes dispoñibles nesta ligazón.