Maiores de 55 anos de toda Galicia viaxarán con Afundación a 6 destinos de 3 continentes despois do verán

Xusto dous días antes de que comece o outono, o 19 de setembro, un grupo de persoas maiores de 55 anos de toda Galicia subirán a un avión en Porto (Portugal) para chegar ata a cidade canadense de Toronto. Logo comezarán un periplo que os levará a lugares de alto interese coma as cataratas do Niágara, Ottawa, Quebec ou Montreal. Os viaxeiros e viaxeiras estarán acompañados en todo momento dun guía e dúas persoas do equipo de Afundación. Ademais, en cada un dos lugares aos que cheguen, un cicerone local recibiraos e axudaralles durante as visitas. Así é o programa Viaxes + 60 da Área de Maiores de Afundación. No 2023, máis de 450 persoas participaron nas expedicións organizadas pola Obra Social de ABANCA. 

A viaxe a Canadá é a máis longa das programadas a partir de setembro: o periplo durará 12 días. Tamén é a única para a que aínda quedan prazas dispoñibles. Xa están esgotadas as cotas para as dúas viaxes programadas en setembro e outubro a destinos europeos: á Costa Brava e o sur de Francia, por unha banda, e a Roma pola outra. En ambos os casos, a duración é de catro días. 

O 15 de outubro comeza o primeiro dos periplos de sete días por Marrocos e as cidades imperiais de Fez, Marrakech, Meknes e Rabat propostos por Afundación para este outono. Repítese entre o 12 e o 19 de novembro. Toda a información do programa Viaxes +60 está dispoñible na páxina web de Afundación.

Todas as viaxes inclúen autobuses desde os Espazos +60 ata o aeroporto, ida e volta, voos con taxas incluídas, hoteis de tres e catro estrelas con pensión completa, guía acompañante e guía local, con audioguías individuais para as visitas, e seguro de viaxe e cancelación. 

Envellecemento activo

O prazo para inscribirse neste 2024 no programa Viaxes +60 abriuse o pasado 20 de febreiro e a demanda foi moi elevada. As prazas para algúns destinos esgotáronse en 2 días. Antes de que comezase o verán, os participantes en Viaxes +60 puideron visitar Estremadura e o Val do Jerte, New York, Berlín e Romanía nunha actividade deseñada, tamén, para  apoiar a dinamización das relacións entre participantes. 

A Área de Maiores de Afundación organiza este programa dende as 11 sedes que a entidade ten en toda Galicia. A actividade forma parte dun conxunto de programas destinados a fomentar a socialización, a aprendizaxe ao longo da vida, o benestar, o desenvolvemento persoal e o aproveitamento da experiencia vital e profesional das persoas maiores a través de proxectos interxeracionais e de voluntariado. 

Con vocación inclusiva e innovadora, os programas da Área de Maiores de Afundación deséñase poñendo no centro as persoas maiores para contribuír a erradicar o idadismo, seguir avanzando cara a unha sociedade libre de estereotipos cara ás persoas maiores, e poñer en valor as súas experiencias a través de iniciativas colaborativas e formativas. 

A programación céntrase en tres ramas principais: a aprendizaxe permanente, a promoción da saúde física, emocional e relacional, e a contribución social a través do voluntariado.