Pingüin, unha obra de monicreques sobre os cambios na estrutura familiar, a nova proposta de Afundación para escolares

O Auditorio do Teatro Afundación de Vigo acollerá durante toda a vindeira semana a última proposta escénica da programación de teatro para escolares de Afundación para este curso. Más de 4000 escolares de educación infantil de 55 centros de Vigo e arredores gozarán de Pingüin, de Empatía Teatro, unha produción que a través das divertidas peripecias dun pequeno pingüín trata en clave de humor situacións cotiás da vida entre pais, nais e fillos. As representacións serán os días 8, 9, 10, 11 e 12 de abril, con funcións ás 10.00 e ás 12.00 h. A función das 10.00 h do mércores 10 de abril contará con interpretación en linguaxe de signos. 

Con Pingüin abórdase o tema da difícil situación á que se enfronta un neno cando ten que compartir o agarimo e a atención dos seus pais cun novo membro na familia. O noso «príncipe destronado» deberá superar esta proba e darse conta de que gañou un amigo para toda a vida. Esta obra foi recoñecida con Premio a Mellor Espectáculo no World Art Festival of Puppets de Praga e o Premio a Mellor Proposta Dramática na Fira de Titelles de Lleida.

Esta obra forma parte da programación escénica para escolares da Obra Social de ABANCA. As artes escénicas teñen unha especial relevancia dentro da programación que deseña cada curso o equipo da área educativa de Afundación co obxectivo de reforzar a formación que os estudantes reciben nas aulas, promovendo unha educación en valores e competencias transversais que potencia o talento, a autonomía, a solidariedade, a creatividade, a autoestima ou o traballo en equipo. Neste sentido, as artes escénicas están consideradas como unha das ferramentas educativas máis útiles para estimular a capacidade de observación dos estudantes, posibilitar o diálogo e a reflexión e desenvolver habilidades sociais.