Persoas voluntarias de entre 62 e 79 anos promoven con Afundación unha tenda solidaria

Durante todo o ano comparten horas, coñecementos e aprendizaxes nos obradoiros do Espazo +60 de Afundación en Pontevedra. E no mes de decembro promoven unha tenda solidaria. Doaranlle a recadación íntegra ao Comedor de San Francisco. Son as 18 persoas voluntarias de Pontevedra que participan no programa «O valor da experiencia», da Obra Social de ABANCA. O seu mercado solidario deste decembro permanecerá aberto durante o día de mañá mércores, 10 de decembro, das 11.00 ás 13.00 h no Café Moderno Afundación.

Quen se achegue ao mercado solidario poderá atopar amigurumis, pequenas figuras, de animais case sempre, tecidas con ganchillo ou coma crochet polas voluntarias do obradoiro. A técnica do amigurumi procede de Xapón. A monitora voluntaria é a mestra Alcira García Vidal.

Persoas maiores activas

Os obradoiros e os mercados forman parte do programa «O valor da experiencia» da Obra Social de ABANCA, que ten como obxectivo ofrecer novas oportunidades de participación para aproveitar o talento e a experiencia persoal e profesional das persoas maiores ao servizo da sociedade en diferentes ámbitos. As persoas socias dos espazos +60 de Afundación poden participar en actividades de voluntariado interxeracional, cultural e educativo, voluntariado social e comunitario e voluntariado ambiental.

150 persoas voluntarias promoven, con Afundación, un total de 5 mercados solidarios en toda Galicia neste mes de nadal nas localidades de Ourense, Betanzos, Pontevedra, Ferrol e Viveiro. En cada unha das tendas venden os produtos que producen artesanalmente todo o ano nos obradoiros da Obra Social de ABANCA. 

Hai un vídeo de edicións anteriores desta iniciativa en Pontevedra en Afundacion.TV

Imaxe das voluntarias de Pontevedra e tenda solidaria de 2024 nesta ligazón