Persoas voluntarias de entre 52 e 77 anos promoven con Afundación unha tenda solidaria en Betanzos

Cada tarde de martes, 12 persoas voluntarias de Betanzos comparten coñecementos e aprendizaxes no programa «O valor da experiencia», que se desenvolve no Espazo +60 de Afundación na localidade brigantina. A monitora Pilar Lamas, que traballa con carácter voluntario, ensínalles a crear obxectos ou bonecos con la a partir da técnica oriental do amigurumi. E no mes de decembro promoven unha tenda solidaria na que venden o que producen durante todo o ano. Neste 2025, a tenda solidaria estará aberta dende mañá mércores día 10, e ata o venres día 12. Será fronte ao propio Espazo +60, na praza dos Irmáns García Naveira e en horario de mañá e de tarde: de 10 a 13.00 h e de 17 a 19.30 h. A recadación íntegra doaráselle á agrupación da Cruz Vermella en Betanzos.

Quen se achegue ao mercado solidario poderá atopar obxectos coma bonecos, chaveiros ou carteiras tecidos coma amigurumis. A técnica do amigurumi procede de Xapón e parte do croché e do ganchillo. Da man da monitora voluntaria Pilar Lamas, as persoas que participan nesta actividade de Afundación en Betanzos fan artesanalmente durante todo a ano amigurumis tanto en forma de proxectos individuais coma colectivos.

Persoas maiores activas

O obradoiros e o mercado forman parte do programa «O valor da experiencia» da Obra Social de ABANCA, que ten como obxectivo ofrecer novas oportunidades de participación para aproveitar o talento e a experiencia persoal e profesional das persoas maiores ao servizo da sociedade en diferentes ámbitos. As persoas socias dos espazos +60 de Afundación poden participar en actividades de voluntariado interxeracional, cultural e educativo, voluntariado social e comunitario e voluntariado ambiental.

150 persoas voluntarias promoven, con Afundación, un total de 5 mercados solidarios en toda Galicia neste mes de nadal nas localidades de Ourense, Betanzos, Pontevedra, Ferrol e Viveiro. En cada unha das tendas venden os produtos que producen artesanalmente todo o ano nos obradoiros da Obra Social de ABANCA. 

Hai un vídeo de edicións anteriores desta iniciativa en Betanzos en Afundacion.TV

Imaxe das voluntarias da Obra Social de ABANCA en Betanzos nesta ligazón