Os pequechefs prepáranse para a Noite de Reis na Sede Afundación de Vigo

Continúa a programación de cursos de cociña infantil proposta por Afundación na aula de cociña da súa sede de Vigo (Policarpo Sanz, 24-26) nesta ocasión co taller «Os pequechefs preparan a Noite de Reis» para o que xa non quedan prazas dispoñibles.

María Rivas será a encargada de impartilo o día 30 de decembro e os días 2, 3 e 4 de xaneiro en dúas quendas, pola mañá de 11.00 a 13.00 h e pola tarde de 18.00 a 20.00 h. Está dirixido a nenos e nenas de entre 8 e 14 anos, que aprenderán a cociñar orixinais pratos para deixarlles aos Reis Magos na Noite de Reis. As receitas que elaborarán serán veliñas de canelóns, arboriñas de Nadal de milfollas, enrolados festivos de xamón, turrón de chocolate e améndoas, minipizza napolitana de atún, mantecados reais, redondiños reais de gambas e un abeto sorpresa.