Este outono Afundación combina o presencial e virtual para levar a arte a toda Galicia

Afundación, adaptándose ás circunstancias actuais provocadas pola pandemia e co obxectivo de continuar promovendo a creación artística nas súas múltiples facetas, desenvolve este outono un amplo programa de proxectos expositivos para que o público, en Galicia, e tamén fóra da comunidade, poida seguir gozando da cultura, sumando un total de 24 propostas. Así, a Obra Social de ABANCA estendeu a programación máis aló das súas sedes, cun importante protagonismo de mostras situadas na rúa que saen ao encontro do público, ofrecéndolle un recurso cultural de primeira orde. Compartindo este obxectivo de achegar a cultura a toda a sociedade, Afundación colabora con concellos de toda Galicia para que, a través do proxecto Corrente Cultural, as salas municipais destas localidades exhiban importantes exposicións con mensaxes relevantes, entre os que destaca a sustentabilidade. Así mesmo, Afundación reforzou o seu proxecto de dixitalización dos contidos, con visitas virtuais a todas as súas exposicións, algunhas con recursos tan novos como a realidade aumentada vinculada á exposición de David Rubín. Case 40.000 persoas gozaron desde o mes de setembro destes proxectos expositivos, nos espazos, na rúa ou nas súas versións dixitais.

As imaxes das distintas mostras están dispoñibles aquí.

O proxecto «Miradas desde o confinamento», formado polas exposicións «Galicia en vilo» e «Primavera tras a ventá»; «Sacrificio e ascensión. 15 anos de cómic de David Rubín»; «Cromática. III Mostra Internacional de Ilustración Contemporánea (MiiC)», «Castelao grafista (facsímile)», «O noso Planeta», «Papiromates. Matemáticas + creatividade = papiroflexia», son as mostras que se poden ver actualmente nas distintas sedes de Afundación. Tanto os accesos como a circulación dentro dos espazos expositivos da Obra Social de ABANCA foron adaptados conforme ás recomendacións sanitarias para poder seguir gozando da cultura dun modo seguro.

No contexto do seu proxecto de trasladar a actividade cultural fora dos espazos onde se desenvolve tradicionalmente, mostrándolla tamén a un público que habitualmente non acode ás salas de exposicións e centros culturais, a entidade incorporou as rúas como escenarios expositivos, unha alternativa que resulta especialmente adecuada no contexto sanitario actual e enriquece os momentos de encontro nos espazos públicos. Así, na Coruña, no Cantón Grande, exhíbese actualmente a exposición «Galicia en vilo», na que sete fotoperiodistas galegos mostran un retrato do que sucedeu no exterior das nosas casas durante o confinamento, exercendo así de notarios da historia para a posteridade. Neste ámbito sitúase tamén «Vivir o mar», que se puido visitar na Praza de Armas de Ferrol nos meses de setembro e outubro. Unha selección de imaxes do recoñecido fotógrafo Philippe Plisson, de gran forza e beleza, que axudan a sensibilizar sobre o estado dos mares e océanos e convidan a adquirir un compromiso coa conservación do medio mariño.

O MUSEO A GALERÍA E AS VISITAS VIRTUAIS

Afundación puxo en marcha un proxecto de dixitalización dos seus proxectos expositivos, co obxectivo de que o público poida achegarse ás propostas culturais neste novo contexto provocado pola pandemia, que dificulta o acceso aos espazos, pero tamén para levar os proxectos que se desenvolven en Galicia a públicos doutras poboacións españolas e doutros países, sen límites xeográficos, abrindo así unha xanela ao mundo.

Neste contexto nace o proxecto Agalería, o museo virtual dela Obra Social de ABANCA que recibiu desde a súa creación no mes de xuño case 20.000 visitas. Trátase dun novo proxecto pioneiro en España, con carácter dinámico e interactivo, que ofrece ao visitante unha experiencia única que lle permite adentrarse, non só nas obras expostas, senón no propio espazo. Agalería abriu as súas portas virtuais co proxecto expositivo «O mar nas coleccións de Arte ABANCA e Afundación», unha mostra concibida especialmente para este museo en liña, conformada por 50 obras de 27 autores das Coleccións de Arte de ABANCA e Afundación.

Así mesmo, tanto na WEB de Afundación como na súa canle Afundación TV, o público pode percorrer virtualmente un total de 14 exposicións. As últimas incorporacións foron a mostra «Sacrificio e ascensión. 15 anos de cómic de David Rubín», que se exhibe actualmente na Sede Afundación de Ourense e que incorpora tanto na propia sala de exposicións como na visita virtual novas tecnoloxías de realidade aumentada, ofrecendo unha experiencia única que permite comprender a transformación que experimenta toda produción artística. A outra incorporación recente a estas visitas en liña foi «Cromática. III Muestra Internacional de Ilustración Contemporánea (MiiC)»,  exposta actualmente na Sede de Santiago,  que recolle o traballo de 19 artistas recoñecidos nacional e internacionalmente.

CORRIENTE CULTURAL

Así mesmo, este outono Afundación impulsa unha nova edición do seu programa «Corrente cultural», un proxecto desenvolvido con ABANCA, en colaboración con concellos de toda Galicia, no que traslada propostas culturais fora dos seus espazos, para difundir cultura por toda Galicia, construíndo unha rede de calidade desde o convencemento de que a arte é un elemento imprescindible para potenciar o coñecemento e o desenvolvemento das persoas. Deste xeito, desde setembro ata decembro, a Obra Social de ABANCA exhibe as mostras «Nós tamén fomos emigrantes. Fotografías da Axencia EFE sobre a emigración española», « Auga. O sangue da terra», «Múltiple. A arte do gravado de Picasso a Barceló» e «Fillos do océano», nas localidades de Boiro, Bergondo, Monforte de Lemos, Cee, O Rosal, Cedeira, Xinzo de Limia, Tui, Melide, Chantada e Ribadavia.