O Café Moderno Afundación en Pontevedra acolle os novos talentos galegos do certame Xuventude Crea da Xunta de Galicia

09.09.2021. Afundación, a Obra Social de ABANCA, acolle no seu Café Moderno de Pontevedra a mostra «Xuventude Crea, máis dunha década. Unha mirada ao pasado, unha mirada ao futuro», a partir de hoxe, xoves 9 de setembro e ata o vindeiro 9 de outubro. Ao acto de inauguración, que tivo lugar esta mañá ás 12.15 h, asistiron Paloma Vela, coordinadora adxunta de Cultura e responsable da Colección Afundación; Cristina Pichel, directora general de Xuventude, Participación e Voluntariado; Alexandra Rodríguez Rey, comisaria da mostra; Carmen Fernández, directora territorial ABANCA Pontevedra; e Teresa Bernal, subdirectora xeral de Programas para a Xuventude.

Ao longo de 14 edicións, o certame Xuventude Crea converteuse nunha plataforma dinamizadora do talento artístico novo en Galicia. Abranguendo catorce especialidades, trátase dun dos concursos nos que a multidisciplinariedade creativa queda máis patente. Desde xoiaría, téxtil, pintura, danza, graffiti ou videocreación, ata banda deseñada, cociña ou videoxogos, as convocatorias de Xuventude Crea conseguen xuntar o potencial de Galicia no eido da arte contemporánea.

A mostra que comisaría Alexandra Rodríguez Rey presenta un total de 29 pezas escollidas entre todas as presentadas ás diferentes edicións deste certame e que o público poderá contemplar, cunha visita guiada complementaria da man da propia comisaria, todos os xoves e sábados, de maneira gratuíta, previa reserva a través deste formulario. 

As imaxes da inauguración están dispoñibles aquí:

https://drive.google.com/drive/folders/1b1lGusONMUSkwdZNI2LOF6j57kvVqxJs?usp=sharing

Toda a información da actividade de Afundación, na nosa SALA DE PRENSA.