Maiores de 55 anos de toda Galicia parten cara a Marrocos nunha viaxe organizada pola Área de Maiores de Afundación
Comeza a viaxe a Marrocos organizada pola Área de Maiores de Afundación. Do 15 ao 22 de outubro, 45 persoas dos espazos +60 Afundación da Coruña, Ferrol, Lugo, Ourense, Pontevedra, Vigo e Santiago de Compostela partirán desde Santiago de Compostela e comezarán o itinerario que as levará a percorrer, entre outros destinos, as cidades imperiais de Marrakech, Fez, Rabat e Meknes. Os viaxeiros e viaxeiras estarán acompañados en todo momento dun guía e dúas persoas do equipo de Afundación. Durante o pasado ano, máis de 450 persoas participaron nas expedicións organizadas pola Obra Social de ABANCA.
Todas as viaxes inclúen autobuses desde os espazos +60 ata o aeroporto, ida e volta, voos con taxas incluídas, hoteis de tres e catro estrelas con pensión completa, guía acompañante e guía local, con audioguías individuais para as visitas, e seguro de viaxe e cancelación.
Envellecemento activo
O prazo para inscribirse neste 2024 no programa Viaxes +60 abriuse o pasado 20 de febreiro e a demanda foi moi elevada. As prazas para algúns destinos esgotáronse en 2 días. Ao longo do ano, os participantes en Viaxes +60 puideron visitar Estremadura e o Val do Jerte, New York, Berlín, Roma, Canadá e Romanía nunha actividade deseñada, tamén, para apoiar a dinamización das relacións entre participantes.
A Área de Maiores de Afundación organiza este programa dende as 11 sedes que a entidade ten en toda Galicia. A actividade forma parte dun conxunto de programas destinados a fomentar a socialización, a aprendizaxe ao longo da vida, o benestar, o desenvolvemento persoal e o aproveitamento da experiencia vital e profesional das persoas maiores a través de proxectos interxeracionais e de voluntariado.
Con vocación inclusiva e innovadora, os programas da Área de Maiores de Afundación deséñase poñendo no centro as persoas maiores para contribuír a erradicar o idadismo, seguir avanzando cara a unha sociedade libre de estereotipos cara ás persoas maiores, e poñer en valor as súas experiencias a través de iniciativas colaborativas e formativas.
A programación céntrase en tres ramas principais: a aprendizaxe permanente, a promoción da saúde física, emocional e relacional, e a contribución social a través do voluntariado.