Luz Casal amosará a súa alma no Teatro Afundación de Vigo o 6 e o 7 de outubro

Luz Casal define a súa última produción discográfica, «Las ventanas de mi alma», como a máis persoal e autobiográfica da súa carreira. Presentaraa en Vigo en dous concertos programados ás 20.30 h no Teatro Afundación o 6 e o 7 de outubro. As entradas están á venda en Ataquilla.com.

Tras cinco anos sen publicar material inédito, Luz Casal regresa cun novo disco no que se presenta «sen máscaras nin artificios, franca e apaixonada como sempre e máis ancorada á realidade que nunca». Ao longo de doce temas, que oscilan entre o rock e os sons máis clásicos, Luz Casal explora novos sons e aborda contidos actuais nun álbum rotundo da que é unha das voces máis inconfundibles do panorama musical europeo: «Un disco que supón unha luz de esperanza, que tende a man en cada canción, ofrecendo saídas no medio da escuridade e exorcizando pantasmas propias e alleas».

Como un claro referente da música en español, Luz Casal estrea produción discográfica nun ano de importantes recoñecementos públicos para a artista e a súa obra. No mes de maio foi nomeada Comendadora das Artes e as Letras, a maior distinción que concede Francia a aquelas persoas que «destacan polas súas creacións no dominio artístico ou literario e pola contribución que fan ao esplendor das artes e letras en Francia en particular e no mundo en xeral», un galardón que recibiron, entre outros, Bob Dylan, Mercedes Sosa, David Bowie ou Meryl Streep, entre outros. E en xullo foi recoñecida coa Medalla de Ouro de Galicia, nun galardón compartido con Juan Pardo e Carlos Núñez, todos eles distinguidos como «intérpretes dun pobo inmenso e dun tempo longo que contribúen a unha Galicia cada vez máis grande e sen límites».

Imaxe dispoñible na seguinte ligazón.