Estudantes do Centro de FP Afundación da Coruña retiran máis dunha tonelada de especies exóticas invasoras
O programa de voluntariado ambiental de Afundación e ABANCA «Traballando pola mellora do patrimonio natural» reuniu esta mañá a máis de 50 persoas, principalmente estudantes e docentes do Centro de Formación Profesional Afundación da Coruña, convocadas polo programa de voluntariado Actúa de Afundación e ABANCA para realizar labores de retirada de especies botánicas exóticas invasoras na contorna da Torre de Hércules.
A actividade, organizada en colaboración co Grupo Naturalista Hábitat e o Concello da Coruña, tiña como obxectivo fundamental controlar a presenza de exemplares de Carpobrotus edulis (coñecida popularmente como «uña de gato») nunha zona de importante valor ecolóxico, declarada recentemente como Espazo Natural de Interese Local (ENIL). As persoas participantes retiraron en total unha tonelada desta especie exótica invasora surafricana orixinaria da rexión do Cabo. A Carpobrotus edulis, que chegou a través da xardinería e ten unha gran capacidade enraizante, adoita ocupar medios costeiros, formando un tapiz sobre o substrato que altera as condicións do chan, principalmente insolación e dispoñibilidade de nutrientes.
O voluntariado da Obra Social de ABANCA, no marco do programa «Traballando pola mellora do patrimonio natural», colabora co control desta especie exótica invasora na contorna da Torre de Hércules desde 2017, dentro do proxecto desenvolvido polo grupo Naturalista Hábitat e o Concello da Coruña. Co recolleito hoxe, retiráronse ata o de agora máis de 62 toneladas de «uña de gato».
Xunto aos labores de limpeza e retirada de especies invasoras, as persoas participantes recibiron información sobre este enclave e sobre boas prácticas para contribuír así á súa posta en valor e conservación da súa riqueza natural, como parte dos obxectivos deste programa que buscan non só recuperar a contorna, senón tamén contribuír a estender na sociedade unha conciencia sostible.
Coas iniciativas de voluntariado no ámbito do medio ambiente, Afundación e ABANCA queren conseguir un impacto directo en catro Obxectivos de Desenvolvemento Sostible (ODS): ODS 10 «Redución das desigualdades», ODS 13 «Acción polo clima», ODS 14 «Vida submarina» e ODS 15 «Vida de ecosistemas terrestres».
As imaxes da actividade están dispoñibles aquí