A Sede Afundación A Coruña acolle un concerto solidario a prol de AGA-Ucraína

Afundación, a Obra Social de ABANCA, acollerá na súa Sede da Coruña, o vindeiro venres 1 de xullo ás 20.00 h un concerto destinado a recadar fondos para AGA-Ucraína. As entradas para este evento, que tamén conta cunha fila 0, están dispoñibles en Ataquilla.com. Os músicos vinculados á Orquestra Sinfónica de Galicia, Ludwig Dürichen, (Alemaña, 1978) e Marianna Prjevalskaya (Moldavia, 1982) sensibilizados coa tráxica situación que está a vivir Ucraína e co labor de axuda que está a levar a cabo a Asociación AGA-Ucraína en Galicia, unen o seu talento e o seu esforzo para interpretar este recital que ten como obxectivo recadar fondos para esta asociación.

As imaxes están dispoñibles aquí.

A Asociación Galega de Axuda a Ucraína AGA-UCRAINA constituíuse o pasado 28 de febreiro de 2022, tras a invasión de Ucraína pola Federación Rusa. A iniciativa é dun grupo ucraínos con residencia en Galicia, xunto a familiares e amigos, co propósito de axudar ao seu país nestes difíciles momentos. Enviou a Ucraína máis de 300 toneladas de axuda humanitaria (alimentos, roupa, material de hixiene e #primeiro auxilios, mantas, etc), tamén en colaboración con Afundación e ABANCA, e medicamentos e equipos médicos a hospitais. Trouxo a Galicia 350 desprazados pola guerra, aloxándoos con familias voluntarias e axudándolles coa súa documentación, asistencia médica, clases de español, actividades para nenos e adultos, axuda psicolóxica, inserción laboral, etc. AGA UCRAINA está inscrita no Rexistro Central de Asociacións, no de Axentes de Cooperación Exterior como ONG de axuda ao Desenvolvemento, e no de Entidades Prestadoras de Servizos Sociais, todos eles da Xunta de Galicia.