A Fundación IgualArte participa no programa de teatro para escolares de Afundación con 'Mistura'
Afundación, a Obra Social de ABANCA, presenta mañá xoves 6 de novembro, ás 10.00 e ás 12.00 h, no Auditorio da Sede Afundación da Coruña, unha nova proposta escénica dentro da súa programación de actividades para escolares. Nesta ocasión, a Fundación IgualArte presenta Mistura, un espectáculo audiovisual con música orixinal en directo, que se representará ante preto de 200 alumnos e alumnas de 5º e 6º de Educación Primaria de 4 centros escolares da Coruña e localidades derredor.
A Fundación IgualArte traballa con persoas con diversidade funcional no eido artístico dende 2002. Nace da premisa de que a arte é un dereito colectivo e, partindo disto, crea a primeira escola artística estable. No 2008 pon en marcha o primeiro centro ocupacional artístico, perseguindo a especialización para a integración laboral.
As súas diferentes agrupacións artísticas participan en moitas das propostas educativas de Afundación, e nesta ocasión presentan Mistura, un espectáculo audiovisual con música orixinal en directo que percorre un camiño de luces e sombras, convidándonos a viaxar por temáticas nas que a mestura é a protagonista, presente na nosa vida diaria e sendo actriz principal nas nosas vidas. A posta en escena é un berro que defende todos os matices, apostando pola conquista do diferente, pola pluralidade e diversidade, facéndonos conscientes de que esta non pode ser incómoda e convidándonos a saír da casca e do medo.
As artes escénicas teñen unha especial relevancia dentro da programación para escolares que deseña cada curso o equipo da área educativa de Afundación co obxectivo de reforzar a formación que os estudantes reciben nas aulas. A programación está deseñada para promover unha educación en valores e competencias transversais potenciando o talento, a autonomía, a solidariedade, a creatividade, a autoestima ou o traballo en equipo. Neste sentido, as artes escénicas están consideradas como unha das ferramentas educativas máis útiles para estimular a capacidade de observación dos estudantes, posibilitar o diálogo e a reflexión, e desenvolver habilidades sociais.