Kerry Kennedy, presidenta da Fundación Robert F. Kennedy Human Rights, visita Galicia invitada por Afundación e a UIE

Kerry Kennedy, presidenta da Fundación Robert F. Kennedy Human Rights, iniciou hoxe a súa primeira visita institucional a Galicia no marco da colaboración subscrita entre a fundación que custodia o legado do seu pai, o senador estadounidense Robert F. Kennedy, a Universidad Intercontinental de la Empresa e Afundación, a Obra Social de ABANCA.

A visita institucional de Kerry Kennedy forma parte do protocolo de colaboración asinado pola súa fundación en España, a UIE e Afundación para establecer un marco de traballo conxunto que permita impulsar programas que contribúan a difundir a necesidade de concienciar sobre os dereitos humanos, a tolerancia e os valores democráticos na mocidade e na infancia.

Nun encontro cos medios, celebrado esta mañá na Sede Institucional de UIE en Santiago, a presidenta da Fundación Robert F. Kennedy Human Rights, Kerry Kennedy, subliñou «a necesidade de demostrarlles ás novas xeracións, agora que se atopan ante enormes desafíos como o cambio climático, a intelixencia artificial, determinando mesmo entrevistas de traballo, as ameazas á liberdade de expresión, á liberdade de prensa, o recorte de dereitos a colectivos minoritarios e minorizados, que existen oportunidades, alternativas, dereitos e opcións, e que a educación é o camiño para acceder a elas e materializalas».

Pola súa banda o presidente de Afundación e reitor da UIE, Miguel Ángel Escotet, destacou «que precisamente o papel determinante da educación como semente de futuro na consecución e mantemento dos dereitos humanos, a colaboración entre estas institucións é vital para perseverar no respecto imprescindible para o progreso social».

Na rolda de prensa estivo presente tamén a presidenta da Fundación Robert F. Kennedy Human Rights España, Dra. María Díaz de la Cebosa, artífice da colaboración entre as tres entidades, quen incidiu «na educación como columna vertebral para o desenvolvemento de todos os países, por iso consideramos relevante a acollida do proxecto en Galicia, tanto na UIE como en Afundación, dúas institucións de prestixio e alcance, e comprometidas co legado de Robert F. Kennedy, cuxa continuidade representa Kerry Kennedy». 

Neste primeiro acto, no que Kerry Kennedy asinou no libro de honra da universidade, celebrouse unha reunión entre a Fundación Robert F. Kennedy Human Rights e Afundación e UIE, que marca o inicio das actividades conxuntas.

Profesora honoris causa pola UIE

Esta tarde a Universidade Intercontinental da Empresa nomeará a Kerry Kennedy profesora honoris causa da Facultade de Administración de Empresas e Dereito nunha cerimonia solemne que terá lugar ás 18.00 h en Santiago de Compostela. A presidenta da Fundación Robert F. Kennedy Human Rights pronunciará unha conferencia maxistral e recibirá o diploma e a medalla académica da UIE. O reitor Miguel Ángel Escotet fará a laudatio: «Kerry Kennedy: A forza da palabra, a compaixón e a lei». Previamente, ás 16.30 h, manterá un coloquio cos estudantes da UIE na súa sede en Santiago, destinado a fomentar o diálogo directo entre mocidade e unha das voces internacionais máis destacadas na promoción dos dereitos civís.

O programa continuará mañá, martes 4 de novembro, no IES Rosalía de Castro, onde manterá un encontro ás 11.00 h con estudantes e profesores como parte da programación deseñada polas tres entidades.

Kerry Kennedy visitará pola tarde A Coruña, onde visitará a Sede de Afundación, ás 17.30 h e reunirase, ás 18.30 h, cunha delegación de Special Olympics Galicia.

Fundación Robert F. Kennedy Human Rights

A Robert F. Kennedy Human Rights Foundation, con sede en Washington D.C. e con presenza en 60 países, foi creada en 1968 por amigos e familiares do senador estadounidense Robert F. Kennedy, asasinado ese ano, para promover o seu legado moral. Entre as súas iniciativas destaca a concesión do Premio de Dereitos Humanos con ese nome desde 1984 ao obxecto de distinguir persoas de todo o mundo que fixesen unha contribución significativa aos dereitos humanos nos seus respectivos países.

En 2019 Kerry Kennedy, filla de Robert F. Kennedy, fundou a súa división española, RFK Human Rights Spain, con sede en Madrid, que se centra en preservar os seus valores: a defensa dos dereitos humanos, a xustiza social e o poder da acción individual. Así, a fundación promove a paz, o respecto, a educación en valores e o desenvolvemento do talento en nenos e adolescentes, fomentando a cohesión social e a diversidade.

Kerry Kennedy ten un doutoramento na prestixiosa Facultade de Dereito de Boston College e varios doutoramentos honoris causa e premios internacionais en Estados Unidos, América Latina e outros países dos cinco continentes. Entre as súas publicacións destacan Decir la verdad al poder, Robert F. Kennedy: Olas de esperanza e Citizenship Education and the Modern State.

Imaxes da sinatura no libro de honra e do encontro con medios AQUÍ

Esta tarde, a partir das 19.30 h aproximadamente estarán dispoñibles as imaxes da cerimonia de nomeamento como profesora honoris causa AQUÍ.