José Carlos Plaza propón no Teatro Afundación de Vigo unha reflexión sobre o mal na súa versión libre do Macbeth

En que avanzou a humanidade desde a época de William Shakespeare? É unha das grandes reflexións que propón La mujer sin nombre: Señora de Macbeth, a obra teatral creada como versión libre do clásico Macbeth, de William Shakespeare. Asina o texto, o vestiario, a escenografía e dirixe o espectáculo, un dos grandes directores da escena española nos últimos anos: José Carlos Plaza. A actriz Olga Rodríguez daralle vida á señora de Macbeth. O intérprete Israel Frías asume o papel do protagonista masculino, Macbeth. Aínda están dispoñibles algunhas entradas en Ataquilla.com.

José Carlos Plaza partiu do tema central da obra de Shakespeare, o mal, para desenvolver esta versión libre da obra, unha dos grandes clásicos do teatro de todos os tempos. Porque cando o dramaturgo inglés escribiu esta peza, lembra Plaza, fixo «a obra sobre o mal». O director do espectáculo cre que «hoxe estamos rodeados polo mal: mentiras evidentes, tensións premeditadas, odios inducidos, violencia de xénero…».

Na súa versión, o tamén director do espectáculo quixo, segundo explica, «estudar a esencia da obra» a partir de «tres personaxes: unha muller, un home e o Mal». Pola trama desfilan «unha muller da que Shakespeare oculta o seu pasado» e «un home honesto envelenado pola ambición que é incitado á violencia que corrompe o seu espírito».

José Carlos Plaza foi director do Centro Dramático Nacional e gañou en tres ocasións o Premio Nacional de Teatro. Os intérpretes Olga Rodríguez e Israel Frías tamén son dous referentes da escena española. Compaxinan a súa actividade sobre os escenarios con proxectos noutros soportes como o cinema ou a televisión.

Tempada de abono

O espectáculo é unha das 13 obras teatrais programadas polo Teatro Afundación entre os meses de setembro e decembro e forma parte da Tempada de abono de Teatro, que ofrecerá dous espectáculos máis antes de que remate o ano. Ambos teñen á fronte dos seus elencos grandes nomes da interpretación en España.

O vindeiro 8 de novembro chega ao Teatro Afundación Mentiras Inteligentes, unha elaborada comedia arredor da felicidade. A súa protagonista principal é María Luisa Merlo. No mes de decembro será a quenda de Pandataria, un espectáculo de teatro e danza que ten por protagonista principal a Cayetana Guillén-Cuervo. A obra volve sobre o momento da ditadura de Mussolini en Italia no que un grupo de prisioneiros redacta o Manifiesto de Ventotene, en defensa dunha Europa libre, un texto considerado precursor da idea do federalismo europeo.

Cultura por alimentos

O público que asista ao Teatro Afundación poderá colaborar coa campaña «Cultura por alimentos», desenvolvida pola Obra Social de ABANCA e a Federación Española de Bancos de Alimentos. Para colaborar, abonda con deixar alimentos non perecedoiros nos colectores ubicados para tal fin no teatro. A comida recollida será distribuída entre familias en risco de exclusión en Vigo e a súa área de influencia. 

Imaxes dispoñibles nesta ligazón.