«Galicia universal. A arte galega nas coleccións ABANCA e Afundación» no Gaiás

ABANCA e Afundación participan na próxima mostra que terá lugar na Cidade da Cultura e que se inaugurará o vindeiro 16 de marzo. O ambicioso proxecto expositivo, organizado pola Xunta de Galicia, «Galicia universal. A arte galega nas coleccións de ABANCA e Afundación» reúne 192 obras pertencentes ás coleccións de arte de ambas as dúas entidades.

Por vez primeira, unha mesma exposición reúne case duascentas pezas de moitos dos artistas galegos máis relevantes dos últimos 150 anos. A mostra estará conformada por pinturas, esculturas, fotografías e instalacións, que permitirán contemplar o proceso de avance artístico en Galicia e a influencia e vocación internacionais. As obras articúlanse consonte un criterio temático, no que as pezas se agrupan ao redor de cuestións como a cultura popular, a presenza da muller na arte, o compromiso social, a paisaxe, o retrato, a tradición e renovación ou os movementos da nova arte galega. Esta mostra estará complementada, ademais, por un exhaustivo catálogo que afondará nas cuestións da creación en Galicia, sen esquecer a permeabilidade das tendencias que en cada etapa sacudiron os principios artísticos.

A inauguración contará coa actuación especial de Alejo Amoedo, ao piano, e Asterio Leiva, ao clarinete, para interpretar dúas pezas dunha sonata de Jesús Bal y Gay (Lugo, 1905 - Madrid, 1993), un dos compositores máis importantes do século pasado, integrante da Xeración do 25 e que tivo unha vinculación moi estreita coas correntes artísticas do momento.

A mostra permanecerá aberta ao público ata o vindeiro 14 de outubro.