Éxito de asistencia ás visitas guiadas á exposición «Pontevedra no tempo»
O programa de visitas guiadas á exposición «Pontevedra no tempo» tivo unha gran acollida entre o público da cidade. Os pasados días 17, 18, 24 e 31 de xullo celebráronse as primeiras, coa capacidade completa. As seguintes serán os días 8 e 21 de agosto, ás 19.00 h, da man de Milagros Bará, realizadora, guionista e escritora, que exerce de coordinadora local da mostra. Manuel Gago, comisario do proxecto, guiará unha visita o 5 de setembro, tamén ás 19.00 h. Está previsto que, ante esta demanda, o programa se continúe ampliando con novas sesións.
O éxito das visitas guiadas é unha mostra da boa recepción da exposición, que congrega unha gran afluencia de xente cada día. «Pontevedra non tempo» poderase visitar ata o próximo 14 de setembro na Sede Afundación de Pontevedra, de luns a sábados en horario de 11.00 a 14.00 h e de 17.00 a 20.30 h.
A EXPOSICIÓN «PONTEVEDRA NON TEMPO»
«Pontevedra no tempo» é a derradeira mostra do proxecto «Cidades no tempo», un proxecto organizado pola Fundación Cidade da Cultura e Afundación, a Obra Social de ABANCA, iniciado no ano 2022 co obxectivo de reivindicar a identidade urbana de Galicia. A través dun cento de obxectos físicos e máis de 120 pezas dixitais, a mostra retrata a conciencia desta cidade construída na confluencia de diferentes mundos. A súa privilexiada situación, á beira dun río e no inicio dunha ría, xa lle outorgou a Pontevedra desde a súa orixe unha natureza binomial que, co devir dos séculos, enriqueceu a súa identidade. Porque, máis aló da dualidade rural-urbano na que creceron as cidades galegas, Pontevedra permítese ser vila e capital á vez, conserva un pasado marítimo e mariñeiro e outro rural que explica o seu futuro como centro administrativo, pero tamén como praza fronteiriza.
Á fronte do proxecto está Manuel Gago, doutor en Ciencias da Comunicación e director de culturagalega.gal do Consello da Cultura Galega. Para esta mostra conta co asesoramento, como coordinadora local, da escritora, divulgadora e cronista Milagros Bará. Colaboran tamén de forma esencial institucións da cidade como o Museo de Pontevedra e o Concello, ademais de coleccións privadas e entidades do exterior.