Comezan os campamentos na Residencia de Estudantes Afundación para nenas e nenos ucraínos
Afundación presentou hoxe, martes 28 de xuño, os campamentos para nenas e nenos ucraínos na súa Residencia de Estudantes de Pontevedra, unha proposta vinculada coa nova liña estratéxica da entidade centrada no impulso social e coa participación de AGA-Ucraína. Á rolda de prensa, que tivo lugar ás 10.30 h, asistiron Natalia Afónina Afónina, presidenta de AGA-Ucraína, e Carlota Sánchez-Montaña Puga, coordinadora adxunta da Área de Educación de Afundación.
As imaxes están dispoñibles aquí.
Articulados en catro quendas, desde o 27 de xuño ao 18 de agosto, estes campamentos acollerán nenas e nenos con idades comprendidas entre os 4 e os 19 anos e está tamén aberto á participación das súas nais e mais dos nenos das familias de acollida. Durante o tempo que estarán en marcha, están planificadas actividades deportivas, creativas, ou mesmo saídas culturais e ambientais. Afundación contará tamén coa implicación de dúas persoas tradutoras para facilitar a comunicación e o coñecemento intercultural. Así, a Obra Social de ABANCA ofrécelles un espazo e un tempo de lecer e de descanso que lles permita afastarse das experiencias tan intensas vividas nos últimos meses.
No marco dunha das novas liñas estratéxicas de Afundación asentada no impulso e no compromiso social, a Obra Social de ABANCA respondeu de maneira inmediata ás necesidades derivadas da guerra en Ucraína. Ampliando a rede de alcance do seu programa [email protected], púxose en marcha xa no propio mes de febreiro a colaboración con AGA-Ucraína para o envío de material de primeira necesidade e alimentos non perecedoiros para as zonas afectadas polo conflito. Con máis de 91 toneladas de produtos alimentarios distribuídos, 125 persoas voluntarias implicadas na colaboración, 270 000 euros recadados no chamamento solidario de ABANCA e Afundación e dúas instalacións cedidas a AGA-Ucraína para as actividades de loxística, a implicación de Afundación dá agora un paso máis coa organización duns campamentos de verán destinados á infancia e mocidade ucraína acollida en Galicia.