O voluntariado Actúa de Afundación retira máis de 200 quilos de lixo mariño da Illa de Sálvora

Convocadas por Actúa, o programa de voluntariado de ABANCA e Afundación, 76 persoas desprazáronse hoxe ata Illa de Sálvora, dentro do Parque Nacional Marítimo-Terrestre das Illas Atlánticas de Galicia, para levar a cabo unha dobre xornada de traballo a prol do medio ambiente.

Durante toda a mañá o colectivo de persoas voluntarias traballaron na recollida de lixo mariño nas praias de Area dos Bois, Zafra, e Lagos, onde atoparon fundamentalmente madeiras tratadas con restos de pinturas sintéticas e cravos, palés así como restos de obxectos extraviados no exercicio da pesca, como os xa habituais cabos e cabiños, as marañas de sedelas, os tarugos plásticos das bateas, nasas, boias e fragmentos de redes. Ademais, outra serie de artigos de uso diario con orixe descoñecida, como os restos de bolsas e envoltorios, as latas e botellas de plástico, tapas e tapóns, unha bombilla, etc., así, ata completar 220 quilos, segundo os datos rexistrados tralos traballos de clasificación e pesada cos que rematou esta xornada de voluntariado matinal.

Xa pola tarde, as persoas voluntarias dedicaranse á retirada de diferentes especies de flora exótica invasora detectadas na illa que ameazan significativamente á biodiversidade propia do lugar, como é o caso da Helichrysum foetidum, coñecida popularmente como flor de San Xoán, unha planta de orixe surafricana, moi estendida polas zonas costeiras galegas e que ten un destacado comportamento invasor, medrando cada vez en máis lugares de xeito espontáneo e incontrolado, como no caso da illa de Sálvora.

O proxecto PLANCTON, impulsado desde 2021 por Afundación, a Obra Social de ABANCA, en colaboración co sector pesqueiro e marisqueiro, permitiu ata o de agora a retirada de máis de 47 toneladas de refugallos de areais e fondos mariños de distintas zonas costeiras de Galicia.

Xunto aos labores de limpeza e retirada de especies invasoras, as persoas participantes recibiron información sobre este enclave e sobre boas prácticas para contribuír así á súa posta en valor e conservación da súa riqueza natural, como parte dos obxectivos deste programa que buscan non só recuperar a contorna, senón tamén contribuír a estender na sociedade unha conciencia sostible.

Coas iniciativas de voluntariado no ámbito do medio ambiente, Afundación e ABANCA queren conseguir un impacto directo en catro Obxectivos de Desenvolvemento Sostible (ODS): ODS 10 «Redución das desigualdades», ODS 13 «Acción polo clima», ODS 14 «Vida submarina» e ODS 15 «Vida de ecosistemas terrestres».

As imaxes da xornada están dispoñibles na seguinte ligazón.