O Teatro Afundación Vigo acolle mañá un recital da Real Filharmonía de Galicia
15.10.2020. Afundación, a Obra Social de ABANCA, acollerá mañá, venres 16 de outubro, ás 20.00 h o recital de apertura da Tempada de Abonos de Clásica a cargo da Real Filharmonía de Galicia con Ellinor D’Mellon ao violín o 16 de outubro. O recital consistirá na interpretación de dúas pezas de Max Bruch, Concerto para violín en sol m núm. 1, e Franz Schubert, Sinfonía en si m.
O folleto, coa información da Tempada de Abonos de Clásica, está dispoñible aquí.
Ellinor d’Melon Moráguez
Naceu en Kingston (Xamaica) en 2000. Foi galardoada en diversos concursos internacionais, entre os que destacan os primeiros premios nos concursos Debut Berlín da Filarmónica desta cidade (2017), en Novosibirsk (Rusia, 2016), onde recibiu ademais o premio especial á mellor interpretación dunha peza rusa contemporánea, e no concurso Wieniawski para novos violinistas (Polonia, 2012).
O seus compromisos artísticos levárona a prestixiosas salas de concertos como as filharmonías de Berlín e Colonia, Teatro Mariinsky de San Petersburgo, Auditorio Nacional e Fundación Juan March de Madrid, Concertgebouw de Ámsterdam, Tonhalle de Zúrich, Sala Verdi de Milán, Sala Baltic de Gdansk e Elgar Room do Royal Albert Hall. Participou ademais nos festivais Verbier, Gstaad, Schlesswig-Holstein, Musical Olympus, Interlaken e Wieniawski.
Tcoou coa Orquesta Sinfónica Gävle, a Orquesta de Ópera de Massy (o seu debut en Francia), a Filarmónica de Sofía, a Orquesta de Cadaqués e a Real Filharmonía de Galicia, xunto a Jaime Martín, Jan Latham Koenig e Michail Jurowski, tamén baixo a batuta dos mestres Maximiano Valdés, Stefan Lano, Jaime Martín, Vladímir Spivakov ou Zubin Mehta. Toca un violín Giovanni Battista Guadagnini de 1743.
Co compromiso de seguir promovendo as actividades culturais como un mecanismo fundamental para o progreso persoal e social, Afundación estableceu un esixente protocolo de medidas que permitan á cidadanía gozar de eventos de primeira orde coas maiores garantías de seguridade sanitaria posible.
A PROGRAMACIÓN DE CONCERTOS
Todos os recitais incluídos na Tempada de Música Clásica terán lugar no Teatro Afundación de Vigo (Policarpo Sanz, 13) ás 20.00 h.
Zoar, da Orquesta Sinfónica de Galicia, estará o 22 de outubro no Teatro Afundación Vigo nun concerto con obras de Schumann e Bizet, Escenas infantís e Xogos infantís, respectivamente.
O 12 de novembro será a quenda de Ecléctica Ensemble, tamén da Orquesta Sinfónica de Galicia. Interpretarán Preludio á sesta dun fauno, de Claude Débussy, e a Sinfonía núm. 4, de Gustav Mahler.
A batuta de Paul Daniel dirixirá á Real Filharmonía, acompañada polo violín de Matthiew Arama, o 27 de novembro, nun recital de obras de Aaron Siebert (unha obra encargo da RFG), Einojuhani Rautavaara (Canticus articus) e Jean Sibelius (Concerto para violín en re menor).
O 3 de decembro, a Orquesta Sinfónica de Galicia estará representada polo Cuarteto de Corda Shcubert, que se dará cita no escenario do Teatro Afundación Vigo para ofrecer a súa interpretación do Cuarteto de corda en fa menor número 6, de Felix Mendelssohn; o estreo de «Intermezzo e escena» da Tribuna, de Gabriel Bussi; e O cuarteto de corda en fa maior, de Antonin Dvořáck.
O último concerto da tempada estará protagonizado por Paul Daniel dirixindo a Real Filharmonía de Galicia, o 11 de decembro. A agrupación interpretará Within her arms, de Anna Clyne; Sinfonía pastoral, de Brett Dean; e a Sinfonía número 6 en fa maior, de Ludwig van Beethoven.
Toda a información da actividade de Afundación, na nosa SALA DE PRENSA.