O Teatro Afundación Vigo acolle o Festival Solidario Sorrisos para Ucraína a prol de UNICEF
18.05.2022. A guerra de Ucraína provocou a maior crise de refuxiados en Europa desde a segunda guerra mundial. Máis de 12 millóns de persoas, a maioría mulleres e nenos, abandonaron os seus fogares, das que uns cinco millóns fuxiron aos países veciños, incluíndo España. Co obxectivo de que UNICEF poida continuar dando resposta ás urxentes necesidades da infancia e as súas familias no ámbito da saúde, nutrición, protección e educación, Afundación, coa colaboración do Pallaso Popín e a Fundación Mayeusis, promove o Festival Solidario Sorrisos para Ucraína a prol de UNICEF.
«Impactado pola crueza da guerra na infancia, púxenme mans á obra para mobilizar todo o elenco que é parte deste festival solidario a prol de UNICEF. Artistas, músicos, bailaríns, cómicos, magos e pallasos unímonos de forma totalmente desinteresada para ofrecer, o vindeiro domingo 5 de xuño no Teatro Afundación de Vigo, os nosos mellores espectáculos cheos de humor, maxia e cor», apuntou Adolfo Maguna, Pallaso Popín.
O Festival Sorrisos para Ucraína consta de dúas funcións. A primeira, ás 12.00 h, dirixida ao público infantil e familiar, na que se gozará dos espectáculos de Pallaso Popín, o Conservatorio Mayeusis, Barafunda Animación, Troula Animación, Mago Rey Midas, Voltereta e Volvoreta, Ronny Macarroni, Mago Marco, Jessy Bolbolúa, Pinky e Unidance Escuela de Baile.
A segunda función, dirixida a un público adulto, terá lugar o mesmo domingo, 5 de xuño, ás 19.30h. Presentado por Beatriz Serén, poderemos rir co humor de Sergio Pazos, Arantxa Treus, Carlos Veleiro, Gossip Bufón e gozar da música de Juanjo Cura e das artistas ucraínas Marta Bachek ―pianista―, Mariam Nasaridze ―mezzosoprano― e Iryna Morozova ―violonchelista―.
«Dous meses despois do estoupido da guerra, o impacto na situación dos 7,5 millóns de nenos ucraínos é cada día máis desesperada. A guerra e os desprazamentos masivos estragaron os medios de vida das familias e as súas oportunidades económicas. Os nenos e as súas familias necesitan urxentemente seguridade, estabilidade, acceso aos servizos de saúde, educación e protección», afirmou Irene Marín, coordinadora de UNICEF Comité Galicia. «Queremos agradecer a implicación de Afundación, Pallaso Popín, Fundación Mayeusis e todo o mundo que é parte deste festival solidario, un espectáculo sen igual no que o 100 % da recadación e a fila 0 se destinará a UNICEF para a emerxencia de Ucraína», rematou Marín.
As entradas xa están á venda en Ataquilla.com.
Toda a información da actividade de Afundación, na nosa SALA DE PRENSA.