O Teatro Afundación de Vigo programa un espectáculo cada dous días en maio
Este venres, 3 de maio, o cómico Galder Varas presenta no Teatro Afundación o seu espectáculo Esto no es un show nunha cita para a que as entradas xa están esgotadas. O último día de maio, tamén venres, día 31, Dani Rovira comeza unha estadía de 3 días de representacións. Entre os espectáculos de ambos os actores, a Obra Social de ABANCA programará en Vigo outras 6 obras de teatro e un musical para todos os públicos: El gran show del Rey León. Tamén haberá catro concertos de música clásica e música coral, dous de música tradicional galega, e un de rock: Revólver volve a Vigo este sábado, día 4. Son un total de 16 propostas as que compoñen a programación do Teatro Afundación en Vigo no mes de maio. Trátase dun espectáculo ou concerto cada dous días. As entradas están dispoñibles en Ataquilla.com.
O mes comeza con música. O Coro da Fundación Princesa de Asturias presentará, dentro da Temporada de Abono de fundación, un programa composto por 12 pezas de música polifónica escritas desde finais do século XIX e ata a actualidade. Será o xoves 2 de maio.
Puro teatro
A programación da primeira semana de maio no Teatro Afundación complétana as 2 primeiras propostas escénicas das 8 que poderá desfrutar o público este mes. Trátase do monólogo de Galder Varas -o venres- e máis de Piensa en Wilbur, o espectáculo de acrobacias, humor e risco do ximnasta e artista de circo Víctor Ortiz. A actuación, para todos os públicos, será o domingo ás 18.00 h.
As propostas escénicas para diferentes públicos seguen na segunda semana do mes. A primeira cita será a do xoves día 9 con La Profesora. A obra, unha comedia escrita para convidar tamén ao público á reflexión, aborda cuestións coma os límites da educación ou a dificultade da sociedade para superar os roles de xénero. Compoñen o reparto Isabel Ordaz e Marcial Álvarez, ambos coñecidos polas súas participacións en series de televisión tan populares coma La que se avecina, Acacias 38 ou El comisario.
Un día despois, o segundo monólogo do mes, tempo de Alex O’Dogherty con Imbécil. Xa o domingo día 12, o Teatro Afundación propón un clásico dos musicais para todos os públicos en gran formato: El gran show del Rey León. A obra ten un elenco composto por 26 artistas entre músicos, bailaríns ou actrices e actores. Actúan en dobre sesión, ás 12.30 h e ás 18 h. Para a sesión da tarde, case non quedan entradas.
Un clásico do teatro no Día das Letras
Un espectáculo construído sobre a improvisación cada vez que se representa, Jamming Sessions (16 de maio); a re-lectura do clásico dramático A Señorita Xulia que propoñen Iria Ares e Xoán Carlos Mejuto (día 17); e os monólogos de dous dos humoristas máis seguidos na actualidade, David Puerto (25 de maio) e Dani Rovira (31 de maio, 1 e 2 de xuño), completan a programación teatral do mes.
1888. Señorita Xulia é unha versión anovadora do texto clásico de August Strindberg. Ideada e dirixida polos seus intérpretes, a proposta foi moi ben acollida por crítica e público en Madrid. Chega a Vigo, en galego, no Día das Letras Galegas.
Músicas dende Vigo e Galicia
Cinco son as propostas musicais que completan a programación do Teatro Afundación en maio. O día 11, a Coral Casablanca e a Orquesta de Vigo presentan o «XLII Memorial Camilo Veiga», en homenaxe a quen fora presidente do Mercantil e fundador de Amigos da Ópera de Vigo. Na semana seguinte a Asociación Cultural Traspés celebra o seu concurso de canto e percusión tradicional. O concerto en Vigo da xira coa que a orquestra folk de Galicia, Sondeseu, celebra o seu XX aniversario, será o venres 24 de maio (20.30 h).
A oferta musical do mes no Teatro Afundación complétana os dous últimos concertos da tempada de abono no primeiro semestre do ano. Comparecerán a Real Filharmonía de Galicia (23 de maio) con Herdanza Africana e máis a Orquestra Sinfónica de Galicia, o día 30, cun programa con obras do húngaro Béla Bartók e do noruegués Johan Halvorsen.