O programa de Afundación «Coñecendo as emocións», dirixido a persoas maiores, esténdese en a 21 localidades galegas e a Madrid
Hoxe en día numerosos estudos destacan a relación entre as habilidades asociadas á intelixencia emocional e a obtención de resultados positivos como o benestar subxectivo, a calidade de vida ou a satisfacción vital. Dito doutro xeito, dedicar tempo a reflexionar e a aprender sobre a conciencia, a comprensión, a expresión e a regulación emocional pode favorecer un maior equilibrio interno, unha mellor adaptación e unha vida máis plena en calquera etapa. Estas habilidades e competencias emocionais adquiren un papel fundamental no proceso de envellecemento no que os desafíos físicos, emocionais e sociais adoitan intensificarse, por exemplo, coa aparición de enfermidades, a perda de seres queridos ou os cambios de contorna. Así o corrobora o programa «Coñecendo as emocións» desenvolvido por Afundación e Matia Instituto que, en 2025, chega á súa V edición.
13 entidades sociais que centran a súa actividade na promoción do envellecemento activo e a saúde mental desenvolverán coa Obra Social de ABANCA ata o próximo mes de febreiro unha nova edición do programa.
Nesta ocasión, «Coñecendo as emocións» desenvólvese nos espazos + 60 Afundación e centros xestionados por COGAMI, Contigo Galicia, Cruz Vermella, ADCOR, AGADEA, ATEGAL, AFAPO, AFEM MOREA, ALCER, Mimosas e O tempo é noso na Coruña, Arteixo, Baiona, Cangas, Ferrol, Lalín, Lugo, Monforte, O Barco, O Grove, Ourense, Pobra do Caramiñal, Pontedeume, Pontevedra, O Porriño, Rianxo, Santiago, Tomiño, Vilagarcía, Vigo e Viveiro. Por primeira vez, «Coñecendo as emocións» estenderase fóra de Galicia, en colaboración con tres entidades de Madrid: a residencia San Camilo, a Fundación SUMMA Humanitate e Cruz Vermella
COÑECENDO AS EMOCIÓNS CHEGA A CONTORNAS DE ATENCIÓN E COIDADOS
Nesta edición, como continuidade do traballo de cocreación levado a cabo polo equipo de Afundación con profesionais de 6 entidades durante a edición 2024 está a impartirse unha versión do programa que se adaptou ás necesidades e capacidades cognitivas de participantes de centros de día e residencias e persoas usuarias de asociacións que traballan en contornas vinculadas ás enfermidades mentais. A transcendencia desta adaptación consiste en levar a formación en competencias emocionais a contornas asistenciais e de coidados con materiais especificamente adaptados.
Imaxes dispoñibles AQUÍ.
OS BENEFICIOS DO PROGRAMA
«Coñecendo as emocións» foi codeseñado con persoas maiores, testeado, validado e implementado en catro edicións sucesivas. Sumando os participantes desta nova edición 2025-2026, a quinta, chegará a máis de 1000 persoas de distintas localidades galegas, tanto rurais como urbanas, e a Madrid.
Os resultados obtidos ata o de agora evidencian que o programa permitiu a mellora do benestar e a adquisición de competencias emocionais das persoas participantes, segundo a investigación realizada por Afundación e Matia Instituto, entidade de referencia en España na materia e con máis de 20 anos de traxectoria. Os resultados, validados ao longo de 5 edicións, mostran que 9 de cada 10 persoas obtiveron beneficios nalgunha dimensión, mellorando a súa conciencia emocional, a súa comprensión das emocións, a súa regulación ou o seu nivel de benestar. Ademais disto, os participantes relatan que melloraron nas súas relacións con eles mesmos e cos demais, grazas á adquisición e desenvolvemento de habilidades e competencias como a escoita activa, a comunicación asertiva ou aprender a poñer límites. Tamén se observa un resultado significativo na saúde percibida, de maneira que as persoas valoran mellor o seu estado de saúde ao finalizar o programa de forma consistente ao longo das edicións do programa.
«O programa permite ás persoas participantes fortalecer os seus recursos persoais e compartir experiencias que lles axudan a afrontar as situacións cotiás, entender as súas reaccións, tomar alternativas para regularse e coidar os vínculos afectivos, e así o subliñan tras finalizar as sesións», destaca Sabela Couceiro, coordinadora da área de Maiores de Afundación.
Tras a exitosa experiencia con persoas socias dos 11 espazos +60 Afundación, o programa estendeuse desde 2024 a 47 centros de distintas entidades que traballan tamén no ámbito das persoas maiores en localidades das catro provincias e en Madrid. O obxectivo é compartir aprendizaxes e xerar unha rede de entidades sociais do ámbito do envellecemento activo e saudable con interese en traballar a mellora do benestar emocional a medida que envellecemos.