O Grupo de Teatro Sénior de Afundación presenta El corregidor corregido no Teatro Rosalía da Coruña

O Grupo de Teatro Sénior de Afundación, a Obra Social de ABANCA, presenta no Teatro Rosalía da Coruña a obra El corregidor corregido, unha adaptación libre de La molinera de Arcos, de Alejandro Casarón, dirixida por Víctor Díaz Barús. Será mañá, mércores 3 de xaneiro, a partir das 19.30 h.

Esta proposta enmárcase no ámbito da promoción do voluntariado e o compromiso social de Afundación, ao doar a recadación obtida, de maneira íntegra, á área de Oncoloxía Pediátrica de Complexo Hospitalario Universitario da Coruña, para que as nenas e nenos ingresados poidan contar con maiores posibilidades de servizos complementarios durante a súa estancia hospitalaria.

O GRUPO DE TEATRO SÉNIOR DE AFUNDACIÓN

O Grupo de Teatro Sénior de Afundación foi fundado na Coruña no ano 1984 polo profesor e director Víctor Díaz Barús. Debutan ese mesmo ano con motivo do 25 aniversario da inauguración do Espazo +60 Afundación da Coruña coa obra Casamento á forza de Molière. 

A partir do ano 1992 alcanza unha gran notoriedade nos circuítos de teatro afeccionado, con numerosas saídas e recoñecementos tanto no ámbito galego como estatal. Mesmo algún dos seus integrantes participa en series de televisión como Mareas vivas, Libro de familia ou Serramoura, en películas como O lapis do carpinteiro e en diferentes anuncios.

Na actualidade o grupo está conformado por socios e socias con idades comprendidas entre os 61 e os 88 anos.