O grupo de teatro do Espazo +60 actúa mañá na Sede Afundación de Pontevedra

A Sede Afundación Pontevedra (Augusto González Besada, 2) acollerá mañá, martes 21 de maio, ás 19.00 h, a nova proposta escénica dinamizada desde o Espazo +60 Afundación de Pontevedra. O seu grupo de teatro, dirixido pola voluntaria Margarita García, porá en escena nesta ocasión Historia de una escalera, de Antonio Buero Vallejo.

Esta agrupación, integrada actualmente por un total de 18 actrices e actores, formouse no ano 2001 e desde entón realizou innumerables actuacións. En 2023 incorporou novos membros polo que se seleccionaron obras para representar que se adapten ben a persoas veteranas e noveis.

Esta actividade enmárcase na iniciativa solidaria «Cultura por alimentos» que Afundación leva a cabo en colaboración con FESBAL (Federación Española de Bancos de Alimentos) e que anima ao público visitante a achegar alimentos non perecedoiros a modo de entrada solidaria, que serán destinados ao banco de alimentos local.