O compromiso social impulsado por Afundación a través de «Cultura por alimentos» achegou máis de 18 toneladas de produtos
Afundación, a Obra Social de ABANCA, superou, coas últimas entregas aos bancos de alimentos locais, as 18 toneladas de produtos recadados a través da firme aposta polo seu programa de innovación social «Cultura por alimentos». Esta semana realizáronse dous actos de entrega que contaron coa presenza do presidente do Banco Rías Altas, Manuel Mora Pita da Veiga, e o presidente de Afundación, Miguel Ángel Escotet, e persoas voluntarias na Coruña e o presidente da Fundación Provincial Banco de Alimentos, Iván Martínez, e unha representación do voluntariado de Afundación no caso de Vigo. En ambos os dous destacouse o compromiso de ambas entidades con este programa de impulso social e que complementa as máis diversas iniciativas que se desenvolven nas sedes da Obra Social de ABANCA.
Grazas a unha eficaz conxunción de cultura e compromiso social, desde o ano 2021, Afundación asume o seu papel de referente tamén neste ámbito e anima a seguir colaborando coa doazón de alimentos non perecedoiros a todas as persoas participantes nas actividades que a Obra Social de ABANCA organiza nas súas sedes e noutros espazos, como os enmarcados en «Corrente cultural». Así, neste Nadal, nas visitas ás exposicións, ás actividades de Naturnova ou aos itinerarios guiados polas mostras, Afundación alenta a continuar coa doazón de produtos non perecedoiros que se entregarán aos bancos de alimentos locais.
Outra modalidade de «Cultura por alimentos» consiste en cambiar a entrada a un evento determinado pola doazón en alimentos. Así, Afundación programou durante 2023 algunhas actividades deseñadas expresamente para servir ao programa «Cultura por alimentos». Así, o ciclo musical de «Butaca de jazz», na Coruña, as funcións familiares nas sete cidades galegas co gallo do Día da Infancia, os ciclos de cine, as visitas guiadas ás exposicións, as conferencias do ciclo «Educación século XXI», o acto de entrega do Premio de Poesía, ou o programa «Quedamos no palco. Quedamos coa clásica» son só algúns dos eventos integrados nesta campaña, que contou cunha extraordinaria resposta do público solidario con esta causa.
As imaxes do evento están dispoñibles aquí.