El abrazo na Tempada de Teatro de Afundación en Vigo e Pontevedra

12.05.2022. Afundación, a Obra Social de ABANCA, desenvolverá a súa Tempada de Teatro de xaneiro a xuño no Auditorio Sede Afundación Pontevedra e mais no Teatro Afundación Vigo. El abrazo, con versión e dirección de Magüi Mira, e as interpretacións de María Galiana e Juan Meseger, representarase no Teatro Afundación Vigo o 18 de maio ás 20.30 h e no Auditorio Sede Afundación Pontevedra, o 19 de maio ás 20.30 h. Unha muller, Rosa, e un home, Juan, de avanzada idade e antigos amantes, reencóntranse e abrázanse despois de case unha vida na que o seu desexo de ter un fillo seguiu latexando. Ese mesmo día, un home aparece feliz na porta de Rosa. É real ou un soño imposible? É un agasallo do destino ou a creación dun problema que as súas vidas son incapaces de asumir? Son os soños, finalmente, a única realidade posible? Christina Herrström pon a proba, con humor e boas doses de acidez, a nosa oxidada capacidade de amar.

A Tempada de Teatro está incluída no programa solidario de Afundación «Cultura por alimentos», mediante o cal a entidade invita todas as persoas que asistan a este espectáculo a colaborar con esta campaña solidaria coa doazón de alimentos, non perecedoiros, que poderán depositar á entrada do teatro. Esta iniciativa solidaria desenvólvese en cooperación con FESBAL (Federación Española de Bancos de Alimentos) e grazas a ela colabórase cos bancos de alimentos locais.

As imaxes da Tempada de Teatro Afundación están dispoñibles aquí:

https://drive.google.com/drive/folders/1BdUASes3dUyTIBGk3XcMV5sqCxEQ2No9?usp=sharing

Toda a información da actividade de Afundación, na nosa SALA DE PRENSA.