Estudantes e familias participarán en senllas conferencias sobre acoso escolar da experta Carmen Cabestany en Afundación
O acoso escolar será o tema central das dúas conferencias que impartirá o vindeiro martes, día 14, na Sede Afundación da Coruña a docente, investigadora, e activista contra o bullying Carmen Cabestany. Ambos os eventos forman parte do ciclo Educación Século XXI. Co-fundadora e presidenta da Asociación Non ao Acoso Escolar (NACE), dialogará sobre como previr o acoso, e como afrontalo cando se produce. Manterá un primeiro encontro con escolares, ás 11.00 h, e ás 19.00 h dirixirase ás familias e público en xeral. O acceso á sesión de tarde realizarase previa inscrición na web Ataquilla.com, convidando os asistentes a colaborar co programa «Cultura por alimentos» entregando a modo de entrada alimentos non perecedoiros que distribuirán a través de FESBAL aos bancos de alimentos locais. Ademais, será emitida en directo a través do portal Afundación TV.
Carmen Cabestany acaba de publicar o libro O bullying é cousa de todos. Acumula a experiencia e os coñecementos adquiridos tras máis de 25 anos como docente e outros 12 anos á fronte da Asociación Non ao Acoso Escolar. Lembra que o bullying é un problema dunha extrema gravidade: afecta a máis de dous millóns de nenas e nenos en España. E cre que o traballo conxunto de estudantes, docentes, familia, policía ou administracións públicas é fundamental para combatelo.
A todo iso referirase na súa conferencia para escolares do próximo día 14 e na que pronunciará, o mesmo día pola tarde, co público en xeral. Trátase de diferentes audiencias e os enfoques das conferencias serán, por tanto, distintos. Aos estudantes lembraralles que «ante o acoso escolar: ti es importante» mentres que a conferencia dirixida ao público adulto titúlase: «Acoso escolar: cando o silencio impera».
O ciclo de conferencias «Educación Século XXI» é xa un marco de referencia de encontro para todas as persoas integrantes da comunidade educativa. Desde o seu inicio, en 2016, desenvolvéronse máis de 100 conferencias con relatores de prestixio como Javier Urra, José Antonio Mariña, Irene Villa, Anna Sans, Iñaki Zubizarreta, Rafael Guerrero, Teresa Viejo, César Bona, David Calle, Ángel Carracedo, David Bueno, Belén Colomina, José Antonio Vázquez Taín, Margarita Pino, José Torres, Ousman Umar, Manuel Isorna, El Langui, Concha Monje ou Patricia Gómez, entre outros.
Con esta proposta, ademais de abordar cuestións innovadoras no ámbito pedagóxico, Afundación quere poñer o foco tamén sobre a importancia dunha educación na que os valores éticos sexan a pedra angular. Para iso, a entidade considera que un dos temas prioritarios é a difusión e a concienciación sobre a necesidade de fomentar o respecto desde a infancia e mocidade, poñendo en valor a importancia da saúde emocional para este proceso de convivencia.