O ciclo «Educación S. XXI» afonda no TDAH e o seu desenvolvemento ao longo da vida da man de Pilar de Castro
«O TDAH ao longo da vida», ese é o título da nova actividade de divulgación programa por Afundación no ciclo «Educación S. XXI», as dúas conferencias que impartirá a especialista en Psiquiatría Infantil e da Adolescencia María del Pilar de Castro Manglano. Haberá unha charla aberta ao público o 18 de novembro, ás 19.00 h, no Auditorio ABANCA (Preguntoiro, 23). Horas antes, ás 11.00 h da mañá, De Castro Manglano pronunciará a conferencia e intercambiará ideas e inquedanzas con escolares de Educación Secundaria, Bacharelato e Ciclos Formativos. As persoas que queiran asistir á conferencia vespertina poden retirar os seus pases, de balde, en Ataquilla.com.
O ciclo de conferencias «Educación S. XXI» é unha iniciativa de Afundación orientada a reflexionar sobre o labor e os retos de familias e docentes na educación actual. Ten entre os seus obxectivos o de pular o diálogo entre a comunidade educativa e especialistas en diversas materias, con temáticas de actualidade e de moi diferente perfil. Neste outono, e en diferentes localidades galegas, as conferencias e os encontros con docentes e alumnado de «Educación S. XXI» abordan temas coma a conexión entre a dieta, a saúde mental, ou o Trastorno por déficit de atención con hiperactividade (TDAH).
Eficacia no tratamento da TDAH
A psiquiatra María del Pilar de Castro Manglano investiga e trata trastornos psiquiátricos complexos na infancia, adolescencia e xuventude. O TDAH é o trastorno máis frecuente nesas franxas de idade. Ten unha prevalencia que se sitúa entre o 5 e o 8% da poboación, e nun 60% pasa tamén á vida adulta. Os seus tres síntomas nucleares son a ausencia de atención, a hiperactividade e impulsividade.
Sobre a maneira de reducir a prevalencia do trastorno por déficit de atención con hiperactividade na vida adulta, e sobre a convivencia co trastorno cando se mantén na xuventude, disertará De Castro Manglano.
Os tratamentos existentes para esta doenza, axustados a cada perfil, mostran eficacia, seguridade e boa tolerancia. A medicación mellora o desenvolvemento neuronal e facilita un desenvolvemento neurolóxico, cognitivo e da conducta que se adapta aos patróns considerados típicos.
«Cultura por alimentos»
As actividades do ciclo «Educación S. XXI» son de balde, pero ao formaren parte do programa «Cultura por Alimentos» son tamén unha canle para a recolección de comida que será distribuída entre familias en risco de exclusión. «Cultura por Alimentos» é un programa desenvolto por Afundación e a Federación Española de Bancos de Alimentos (FESBAL). No Auditorio ABANCA de Santiago de Compostela hai contedores para a recolección das doazóns. Os asistentes poderán depositar alí alimentos non perecedoiros. FESBAL encargarase da distribución en Santiago e a súa área de influencia.