Continúa a Tempada de Teatro de Afundación con ¡Que salga Aristófanes! de Els Joglars
Continúa a Tempada de Teatro de Afundación, a Obra Social de ABANCA, coa produción ¡Que salga Aristófanes!, a nova proposta escénica da emblemática agrupación Els Joglars. Poderáase ver o mércores 16 de novembro no Auditorio da Sede Afundación de Pontevedra e o xoves 17 de novembro no Teatro Afundación de Vigo, en ambos os casos ás 20.30 h.
As entradas están dispoñibles na web Ataquilla.com.
¡Que salga Artistófanes!
Un catedrático de clásicas destituído da universidade é internado nun Centro de Reeducación Psicocultural debido ás secuelas mentais producidas polo seu cesamento. O seu coñecemento e admiración polo mundo clásico, faille asumir por momentos o personaxe de Aristófanes. Así, entre a realidade e a ficción, imaxina o dramaturgo grego como modelo de liberdade fronte a unha sociedade cada vez máis repleta de tabús intocables.