Comezan as visitas guiadas á exposición «A nosa arte» que Parlamento de Galicia expón no Café Moderno Afundación

Comeza o programa de visitas guiadas á exposición «A nosa arte» no Café Moderno Afundación de Pontevedra. Realizadas polo equipo da Área Educativa de Afundación, terán lugar o xoves 21 de marzo e o xoves 18 de abril, en ambos os dous casos ás 19.00 h. A asistencia é de balde, previa inscrición neste formulario. Esta actividade enmárcase na iniciativa solidaria «Cultura por alimentos» que Afundación leva a cabo en colaboración con FESBAL (Federación Española de Bancos de Alimentos) e que pretende levar produtos de primeira necesidade aos bancos de alimentos locais. Podes participar aportando a túa doazón cando asistas á visita guiada.

A exposición está constituída por unha selección de 33 pezas da Colección de Arte do Parlamento de Galicia, que atesoura un total de 300 obras de arte galega, unha memoria viva das diferentes etapas históricas que, ao longo dos últimos cen anos, determinaron as tendencias artísticas adoptadas en Galicia.

Esta mostra, na que colaboran tamén a Xunta de Galicia e a Real Academia Galega de Belas Artes, caracterízase pola súa vocación de difusión entre a cidadanía galega. Deste xeito, o Café Moderno Afundación Pontevedra é a quinta das itinerancias dun proxecto que está a percorrer todas as sedes da Obra Social de ABANCA en Galicia, incorporando, ademais, en cada localidade, algunhas das pezas das creadoras e creadores máis emblemáticos desa zona en particular.

Comisariada pola Real Academia de Belas Artes a través de tres dos seus académicos, María Victoria Carballo-Calero, Felipe-Senén López Gómez e José Carlos Valle Pérez, poderá visitarse ata o próximo 25 de maio, en horario de luns a domingo de 10.00 a 13.30 h e de 16.00 a 21.00 h.