Carlota Sánchez Montaña, en «Educación siglo XXI» en la Sede Afundación Afundación Lugo

29.03.2022. A Sede Afundación de Lugo acollerá o xoves 31 de marzo, ás 19.00 h, a conferencia de Carlota Sánchez Montaña, «Do presente coñecido ao futuro por coñecer. A educación chega tarde» no marco do ciclo «Educación século XXI». O formulario de inscrición está aquí.

«Do presente coñecido ao futuro por coñecer. A educación chega tarde»

Os cambios vividos nas tres últimas décadas como consecuencia da irrupción da tecnoloxía non fixeron máis que empezar. Espérase que nesta década a transformación sexa aínda máis disruptiva, xa que se interpuxo a tecnoloxía entre nós e a realidade, o cal ten un efecto directo sobre a forma en que nos relacionamos, compramos, vivimos..., o que nos leva a unha nova era dixital que debemos coñecer polos efectos sobre os nosos datos e a nosa privacidade.

O tsunami da disrupción tecnolóxica impulsada polo despregue das redes 5G vai facilitar a conexión de miles de aparellos, un impulso definitivo da intelixencia artificial, a robótica, a realidade estendida e a posibilidade dunha vida totalmente dixital, no xa coñecido como metaverso.

En paralelo, o noso esgotado planeta non para de lanzar sinais de alerta, con evidencias dun cambio climático do que xa ninguén dúbida, o que suscita a necesidade de solucións innovadoras que permitan cumprir os compromisos da axenda 2030.

Cando todo o mundo empresarial se vai ver sometido a un proceso de aprendizaxe constante de novas habilidades e a unha permanente actualización das súas competencias, os modelos educativos non puideron evolucionar á velocidade que esta nova era require e mantéñense ancorados en modelo do pasado. É urxente a implantación de novas metodoloxías de aprendizaxe nas aulas.

Esta actividade enmárcase na iniciativa solidaria «Cultura por alimentos» que Afundación leva a cabo en colaboración con FESBAL (Federación Española de Bancos de Alimentos) e que pretende levar alimentos de primeira necesidade aos bancos de alimentos locais. O acceso a cada unha das sesións será a cambio da entrega dalgúns destes produtos.

Carlota Sánchez Montaña

Licenciada en Dereito e Empresariais e cun mestrado en Administración de Empresas por IESIDE, na actualidade é coordinadora adxunta da Área de Educación Superior de Afundación, e desde hai máis de 30 anos, profesora titular do ámbito de finanzas de IESIDE. Imparte cursos de grado, posgrao e directivos e é invitada como relatora en numerosos seminarios e xornadas en temas relacionados con financiamento, emprendemento e liderado dentro do ámbito empresarial. Entre os seus intereses de investigación, destaca o proceso de transformación a consecuencia da dixitalización da sociedade e os seus efectos sobre as nosas vidas. Actualmente, é unha das impulsoras e relatoras do programa de educación financeira de Afundación e participa tamén en actividades do programa Eduemprende da Consellería de Educación da Xunta de Galicia.

«Educación século XXI»

A necesidade de consolidar un marco de educación asentado en valores éticos e de comprensión e apoio recíproco de toda a comunidade educativa é un dos principios que se seguen nas actividades didácticas desenvolvidas en Afundación. «Educación século XXI» de Afundación, a Obra Social de ABANCA, é un programa no que se quere destacar a importancia dunha educación asentada en valores no que docentes, nenas e nenos e as súas familias poidan coñecer técnicas, mecanismos e estratexias que favorezan a convivencia na contorna escolar para a consolidación dunha sociedade cohesiva e solidaria na que a igualdade e o respecto sexan os cimentos das relacións interpersoais.

Os contidos están accesibles tamén en diferido e difúndense a través das RRSS da Obra Social de ABANCA, co obxectivo de que estean ao alcance de toda a poboación, fornecéndoa, así, de ferramentas que contribúan a mellorar a nosa sociedade no seu conxunto.

Toda a información da actividade de Afundación, na nosa SALA DE PRENSA.