Tres estudantes do instituto de UIE, clasificados para o mundial de vela Vaurien que se disputará en xullo en Vigo
. Tres estudantes do instituto da Universidade Intercontinental da Empresa, UIE, clasificáronse para o mundial da clase Vaurien, tras o Campionato de España disputado esta Semana Santa na Ría de Vigo. As irmás Paloma e Paula González Esteban, estudante de IESIDE-UIE e enfermeira, respectivamente, gañaron o Campionato de España, revalidando o seu título absoluto feminino co seu barco «Concello de Poio». Pola súa banda, Omar Colmenares González e Antonio Novo Moruja, na embarcación UIE, onde cursan Administración e Dirección de Empresas, lograron un meritorio posto 16, clasificándose así tamén para o Campionato do Mundo que se disputará en Vigo do 23 ao 30 de xullo.
O reitor da Universidade Intercontinental da Empresa, Miguel Ángel Escotet, felicita a estes estudantes polos logros obtidos «que son unha mostra de que o esforzo, a constancia e a dedicación son válidos en calquera ámbito da vida, uns valores que promovemos desde UIE, unha universidade centrada nas persoas, que educa para o talento e o talante, fortalecendo os coñecementos, as habilidades e as destrezas, pero sobre todo para aprender máis aló da universidade».
Paloma González Esteban, estudante de ADE en UIE e a súa irmá Paula, enfermeira, pertencen ao RCN de Vigo e gañaron o campionato co seu barco «Concello de Poio», municipio do que ambas son naturais. Paloma navega desde 2012, curiosamente ao principio non lle atraía a vela, ata que a descubriu en Sanxenxo. Tanto ela como Paula compatibilizan estudos e traballo para adestrar cada fin de semana e roubar as horas que poden á semana. A pesar do esforzo, o deporte achega á súa vida moitos valores. Como subliñan, «a vela ensínache o traballo en equipo, a constancia, disciplina, a orde e a dedicación». Agora ambas teñen a mente na cita de xullo, onde tentarán conseguir o primeiro posto do Mundial, como xa lograron en 2018.
Antonio Novo Moruja, pontevedrés, navega desde os 7 anos. Estudante de segundo curso de ADE en IESIDE- UIE, pertence ao club Náutico de Sanxenxo como regatista e adestrador. Para compatibilizar estudos e deporte, organiza o seu tempo durante a semana e fai «un esforzo extra» para poder ter a fin de semana dispoñible para os adestramentos. Segundo subliña, «o deporte achégame disciplina e organización e axúdame a motivarme: un exame podes preparalo e por circunstancias saír mal, se sucede, en lugar de desmotivarme, poño máis esforzo». Omar Colmenares González, nado en Oviedo e afincado en Vigo desde neno, pertence ao Club Marítimo de Canido, onde é regatista e adestrador, e estuda tamén segundo curso de ADE. Empezou a navegar aos 12 anos, cando o seu avó lle regalou un curso dunha semana, e desde entón non puido estar máis dunha semana sen tocar un barco. Omar resalta que tivo que «sacrificar moitas cousas por adestrar, realizar os traballos de luns a venres porque as fins de semana son para adestrar. Cústame compatibilizar pero son capaz, simplemente é poñerse obxectivos e organizarse. A cambio, o deporte achégame disciplina e responsabilidade e ambas as vexo reflectidas nos meus estudos».
É a súa primeira regata xuntos e tras as nove probas realizadas para o campionato de España están moi contentos con este resultado que lles levará a disputar o mundial en xullo, representando a España e a UIE, tamén en augas da Ría de Vigo.
Imaxes e vídeo dispoñibles na seguinte ligazón:
https://drive.google.com/drive/folders/1he6jipMvGQdiO0a0pGmRFSGp2TUm2a2G?usp=sharing