Anna Sans conducirá catro sesións interactivas sobre trastornos da aprendizaxe en Afundación TV
Afundación, a Obra Social de ABANCA, iniciará en Afundación TV o 12 de novembro ás 19.00 h o seu mes dedicado ao coñecemento dos trastornos da aprendizaxe en idades temperás. A neuropediatra Anna Sans abordará en catro encontros interactivos con todas as persoas que se inscriban aquí para participar, os retos que a discalculia, o TDAH, os trastornos motores ou visoespaciais poden supoñer para as nenas e nenos nun contorno que debe reforzar a súa atención cara a estas circunstancias. A cuarta sesión analizará a temática que concitase maior interese na elección que levarán a cabo os propios participantes. Estas conferencias enmárcanse no ciclo «Educación século XXI», no que recoñecidos especialistas en materias vinculadas cos métodos de aprendizaxe ou a pedagoxía se dan cita en Afundación para invitar a comprender novos contextos de transmisión do coñecemento. As sesións seguintes terán lugar o 19 e 26 de novembro tamén ás 19.00 h.
Afundación asume o desafío de converterse nunha canle de difusión daqueles trastornos da aprendizaxe que, por circunstancias ríxidas de certos contextos, se atopan menos priorizados. Deste xeito, a Obra Social de ABANCA contribúe a cubrir un baleiro sobre unha cuestión fundamental para consolidar un modelo de ensino aberto e inclusivo, situando o foco do interese nestas temáticas. Para iso, ademais, anímase a que, nestes encontros, as persoas asistentes participen de xeito interactivo nos chats que Afundación TV habilita para tal fin.
A dilatada experiencia de Anna Sans no campo da neuropediatría sitúaa como unha das referentes ineludibles do seu campo en España. A súa nova traxectoria profesional no Intitut Som Via de Neurodesenvolvemento e Aprendizaxe centra o seu labor na potenciación das destrezas das nenas e nenos para identificar aqueles trastornos que poidan estar repercutindo nun menor ritmo de asentamento dos coñecementos. A partir desta detección, e da participación activa de toda a comunidade educativa, o que inicialmente puido ser considerado como unha traba, convértese nun reto do cal a contorna aprende e se beneficia para favorecer o progreso social.
«Educación século XXI»
O obxectivo no campo formativo de Afundación está definido pola vocación en torno a unha educación comprometida mediante a defensa dun sólido sistema educativo integral. Partindo da importancia da escola como centro de aprendizaxe, as propostas de Afundación pretenden complementar o ensino académico, especialmente a instrución, presentando uns espazos e unhas actividades que conxuguen o lúdico e o formativo co fortalecemento de valores esenciais para unha sociedade cohesionada. Deste xeito, a entidade está comprometida coa tolerancia, co respecto, coa solidariedade e, por suposto, coa adquisición por parte de cada nena e de cada neno das ferramentas necesarias para perseverar na adquisición da súa autonomía persoal.
As propostas do área Educativa de Afundación abarcan múltiples disciplinas e fomentan o desenvolvemento de competencias transversais. Así, o seu programa inclúe actividades culturais en artes escénicas e plásticas e de fomento da lectura; actividades interxeracionais que reforzan o respecto e o intercambio de coñecementos entre mocidade e xente maior; actividades de educación ambiental para abordar a importancia do respecto polo medio; actividades de novas tecnoloxías, necesarias para o emprego das ferramentas imprescindibles nunha contorna que innova de xeito permanente; e actividades de cociña que ensinan os beneficios dunha alimentación saudable.