Afundación e preto de 150 persoas voluntarias maiores de 60 anos promoven este decembro 5 mercados solidarios en Galicia
A Asociación Española Contra o Cancro de Ourense, a Cruz Vermella de Betanzos, o Comedor de San Francisco de Pontevedra ou a Asociación de Familiares de persoas con Alzhéimer e outras Demencias de Viveiro. Son algunhas das entidades ás que irá destinada a recadación total dos 5 mercados solidarios que Afundación promove neste mes de decembro en Galicia. Nas tendas poderanse mercar artesanías realizadas por preto de 150 persoas voluntarias. Os produtos artesanais á venda, feitos en moitos casos reciclando tecidos ou obxectos usados, son unha parte dos resultados do traballo que as persoas voluntarias desenvolven durante todo o ano nos obradoiros dos espazos +60 da Obra Social de ABANCA. As tendas permanecerán abertas entre 1 e 4 días en cada cidade. A primeira en abrir será o de Ourense, na vindeira semana: o martes e mércores, días 2 e 3.
Os 5 mercados solidarios desenvolveranse noutras tantas localidades das catro provincias galegas. Quen se achegue poderá adquirir artigos coma roupa, bordados, encaixe, bonecos ou carteiras. Ou bolsas feitas cos catálogos de viaxes ou fermosos mandís, por exemplo. Depende da localidade na que se celebre cada mercado solidario. Varía, o tipo de produtos dispoñibles, en función do tipo de técnica ou artesanía que se desenvolve en cada un dos espazos +60 de Afundación.
«O valor da experiencia»
Os obradoiros e os mercados forman parte do programa «O valor da experiencia» da Obra Social de ABANCA, que ten como obxectivo ofrecer novas oportunidades de participación para aproveitar o talento e a experiencia persoal e profesional das persoas maiores ao servizo da sociedade en diferentes ámbitos.
As persoas socias dos espazos +60 de Afundación poden participar en actividades de voluntariado interxeracional, cultural e educativo, voluntariado social e comunitario e voluntariado ambiental. Os obradoiros e mercados solidarios son unha das iniciativas máis consolidadas e que contan cun maior compromiso por parte das persoas participantes. Desenvólvense durante todo o ano.
Cada obradoiro solidario é distinto e nel participan persoas de perfís moi diversos. Algúns dos obradoiros teñen unha traxectoria moi consolidade de más de dúas décadas en funcionamento. Outros son de recente creación. Todos teñen en común o obxectivo de traballar a prol de causas solidarias e establecer lazos de coidados, amizade e cooperación entre as persoas participantes.
Horarios, localidades, e entidades beneficiarias
A recadación íntegra da tenda solidaria de Ourense, que estará ubicada nas instalacións do Complexo Hospitalario Universitario de Ourense, destinarase á Asociación Española Contra o Cancro de Ourense e á Área Sanitaria de Ourense, Verín e Valdeorras do Servizo Galego de Saúde.
O día 10 de decembro celebrarase o mercado de Pontevedra no Café Moderno Afundación a beneficio do Comedor de San Francisco. E tamén dende o 10, pero ata o 12, as persoas voluntarias de Betanzos atenderán a tenda solidaria no espazo +60 do Cantón de San Roque. Doan o seu traballo á Cruz Vermella da localidade brigantina.
Os mercados solidarios de Ferrol e Viveiro terán lugar entre o 15 e 19 de decembro. En Ferrol, a Cociña Económica recibirá a recadación da tenda solidaria, que será na sede da Obra Social de ABANCA na Praza da Constitución.
A Asociación de Familiares de persoas con Alzhéimer e outras Demencias de Viveiro será a beneficiaria do mercado solidario de Nadal que se celebrará no espazo +60 de Afundación da Avenida da Mariña viveirense.
Hai vídeos dos obradoiros e mercados solidarios en Afundación.TV
Hai imaxes de mercados celebrados o pasado ano nesta ligazón