Afundación programa 18 espectáculos no primeiro semestre do ano no Auditorio da súa Sede de Pontevedra

11 obras de teatro e monólogos, 2 espectáculos de ballet, un concerto de música clásica e propostas arredor da maxia ou da danza aérea conforman a programación do Auditorio da Sede de Afundación en Pontevedra no primeiro semestre do ano. Hai xa 18 propostas previstas entre os meses de ata xuño, ou o que é o mesmo: un espectáculo cada 10 días. Xaneiro rexistrará unha intensa actividade: no primeiro mes do ano, o publico pontevedrés poderá elixir entre 7 espectáculos. As entradas están dispoñibles en Ataquilla.com.

Xaneiro: Un calendario sen pausas para abrir o ano

Escolas e artistas profesionais de danza aérea e pole dance de toda Galicia encargaranse de inaugurar a programación o sábado 3 de xaneiro na gala «Galiarte». Un día despois, o domingo 4, de xaneiro, ás 18.00 h, é a quenda do espectáculo familiar Viaje a Oz, el musical, unha proposta para o público familiar: no mundo imaxinario de Dora, a protagonista, personaxes fantásticos percorren paisaxes marabillosas.

O 8 de xaneiro, o Auditorio da Obra Social de ABANCA programa o primeiro concerto de música clásica de 2026. A  Orquestra Xove da Sinfónica de Galicia interpretará composicións de Verdi, Mozart, e Chaikovski.

A programación do mes segue co concerto-tributo a Pink Floyd a cargo de Im-Pulse (día 16); o humor de «Noites de Retranca» (día 17) con Quico Cadaval, Mofa e Befa e Celso Fernández Sanmartín; e a representación de O Lago dos Cisnes a cargo do Ballet Clásico Internacional (día 22). O espectáculo de improvisación Coaches de choque, de Oswaldo Digón e Rafa Durán, o venres 23, será a última cita do mes.

Unha programación rica en artes escénicas

O Ballet de Kiev inaugura a programación do mes de febreiro coa representación de A Bela Durminte. Xa o día 27, Chévere Teatro presenta no Auditorio da Sede de Afundación a súa nova produción: Ictus, anatomía da derradeira leición do Dr. Castelao. A compañía teatral santiaguesa parte do famoso cadro de Castelao A derradeira leición do mestre para explorar a memoria histórica de Galicia, a perda de confianza na democracia e o trauma do franquismo, a través dunha investigación documental sobre as narrativas da memoria colectiva e persoal.

A obra é a primeira das programadas en 2026 na Tempada de Abonos de teatro de Afundación na cidade, que presenta cinco espectáculos no primeiro semestre en Pontevedra. O seguinte será, xa o 13 de marzo, La Música, a obra protagonizada por Ana Duato e Grandinetti baixo a dirección de Magüi Mira e con texto de Marguerite Duras. Completan as propostas da Temporada de Abono Mejor no decirlo, con Imanol Arias e María Barranco -17 de abril-, Querida Agatha Christie -8 de maio-, e a obra Inmaduros, cun elenco liderado por Carlos Sobera e que se representará o día 12 de xuño.

Querida Agatha Christie é unha das dúas pezas teatrais programadas no primeiro semestre do ano que volven sobre a vida, ou a obra, da lendaria escritora británica no ano no que se cumpren 50 anos do seu pasamento. A outra é a versión teatral de Asasinato no Orient Espress protagonizada polo actor Juanjo Artero e que porá un elenco de 10 persoas sobre as táboas no Auditorio de Afundación en Pontevedra.

Completan a programación a comedia de improvisación Corta el Cable Rojo, que chega o 11 de abril a Pontevedra logo de case 15 anos consecutivos de éxito en Madrid -, e unha cita, o 18 de abril, coa maxia e o ilusionismo: Ilusiónate, con Borja Montón. As entradas para Corta el Cable Rojo está a piques de esgotarse.

Hai imaxes dalgúns dos espectáculos nesta ligazón