Afundación presenta unha nova edición de «Educación século XXI»
29.12.2020. Afundación, a Obra Social de ABANCA, renova o seu ciclo de conferencias «Educación século XXI», con novos relatores e temas, consolidando esta firme aposta da entidade pola difusión de modelos formativos diversos, en consonancia cos desafíos e as realidades sociais actuais, e, nesta ocasión, a través de Afundación TV, a nova canle da Obra Social de ABANCA para a difusión de eventos en directo que permiten, así mesmo, a interacción entre público e relatores. Non obstante, existe tamén a posibilidade de encontros presenciais, aínda que supeditada á conxuntura sanitaria. Con iniciativas coma esta, Afundación procura ofrecer foros de intercambio de coñecemento que apelen ao conxunto da comunidade educativa, incluíndo tanto docentes, como a nais e pais.
Nesta ocasión, a Obra Social de ABANCA optou polo deseño de bloques temáticos mensuais, entre xaneiro e maio, nos que destacados especialistas nos seus respectivos ámbitos ofrecerán as achegas máis recentes. Así, a saúde neurolóxica, en xaneiro; a tecnolóxica, en febreiro; contra o acoso escolar, en marzo; e a saúde emocional, en abril e maio, serán os aspectos que se aborden nesta nova edición. Para presentar os achados nestes campos, Afundación conta coa participación de expertos como, por exemplo, Bernardo Viqueira, Rafa Guerrero ou Iñaki Zubizarreta.
«Educación siglo XXI»
O obxectivo no campo formativo de Afundación está definido pola vocación en torno a unha educación comprometida mediante a defensa dun sólido sistema educativo integral. Partindo da importancia da escola como centro de aprendizaxe, as propostas de Afundación pretenden complementar o ensino académico, especialmente a instrución, presentando uns espazos e unhas actividades que conxuguen o lúdico e o formativo co fortalecemento de valores esenciais para unha sociedade cohesionada. Deste xeito, a entidade está comprometida coa tolerancia, co respecto, coa solidariedade e, por suposto, coa adquisición por parte de cada nena e de cada neno das ferramentas necesarias para perseverar na adquisición da súa autonomía persoal.
As propostas da área Educativa de Afundación abarcan múltiples disciplinas e fomentan o desenvolvemento de competencias transversais. Así, o seu programa inclúe actividades culturais en artes escénicas e plásticas e de fomento da lectura; actividades interxeracionais que reforzan o respecto e o intercambio de coñecementos entre mocidade e xente maior; actividades de educación ambiental para abordar a importancia do respecto polo medio; actividades de novas tecnoloxías, necesarias para o emprego das ferramentas imprescindibles nunha contorna que innova de xeito permanente; e actividades de cociña que ensinan os beneficios dunha alimentación saudable.
Toda a información da actividade de Afundación, na nosa SALA DE PRENSA.