Afundación presenta a mirada infantil no traballo de Virginia Rota, Premio Galicia de Fotografía Contemporánea

16.12.2020. Afundación, a Obra Social de ABANCA, presenta en Ferrol a exposición «O mundo ao principio», de Virginia Rota, gañadora do VI Premio Galicia de Fotografía Contemporánea, certame organizado polo Festival Outono Fotográfico, coa colaboración de Afundación e o patrocinio da Xunta de Galicia e a Deputación de Lugo. A mostra presentouse esta mañá en rolda de prensa coa participación dos responsables do Festival Outono Fotográfico, Xosé Lois Vázquez e Vítor Nieves, quen, ademais, é o comisario da exposición, e a coordinadora da Sede Afundación de Ferrol, Verónica Rego. Poderase visitar a partir de hoxe e ata o próximo 29 de xaneiro na Sede Afundación de Ferrol, de luns a venres en horario de 11.00 a 14.00 h e de 17.00 a 20.30 h.

«O mundo ao principio» nace da necesidade humana de regresar á infancia, ao tempo da inocencia anterior á toma de conciencia do horror. Virginia Rota traballou neste proxecto durante tres anos, man a man con nenos e nenas de entre catro e once anos a quen a artista retratou individualmente antes de lles encomendar a tarefa de retratar «a beleza» e «o importante» cunha cámara de un só uso de 27 fotografías, sen contar coa axuda de persoas adultas. Froito desta extraordinaria encarga nace a presente mostra, conformada polas instantáneas sacadas polos nenos e nenas e os retratos das propias crianzas feitas por Rota e merecedoras do VI Premio Galicia de Fotografía Contemporánea, como un ensaio coral sobre a estética e os valores máis intuitivos. Estes poden parecer connaturais ao ser humano, mais só o son durante a infancia, polo tanto, abandónanse cando se madura e se toma conciencia do abafador que resulta reflexionar sobre estas cuestións. En palabras do comisario da exposición, Vítor Nieves, «este proxecto fotográfico é toda unha sentenza a prol da infancia, un retrato da liberdade de pensamento».

Virginia Rota pasa a integrar o catálogo do Premio Galicia de Fotografía Contemporánea, o máis prestixioso deste ámbito en Galicia e un dos máis importantes de España, onde se encontran nomes tan sobresaíntes como Daniel Díaz Trigo, Berto Macei, José Romay, Eva Díez, Jon Gorospe ou Alfonso Almendros. Todos eles, ademais de exhibiren a súa obra nas salas de exposicións de Afundación, tamén itineraron por outras comunidades españolas así como por outros países como Portugal, Brasil ou Noruega.

Na seguinte ligazón están dispoñibles as imaxes da mostra:

https://drive.google.com/drive/folders/1vbbYBS0LTSPds1_3jptgGc0J8CzLWt3_?usp=sharing

Toda a información da actividade de Afundación, na nosa SALA DE PRENSA.