Afundación presenta en primicia en Vigo unha selección do máis destacado da obra de Héctor Francesch

Ao longo da súa traxectoria creativa, Héctor Francesch (A Coruña, 1977) asinou unha obra plástica cun orixinal e recoñecible estilo;  unha linguaxe visual única no que observamos unha gran riqueza de referentes do cómic, a arte urbana ou a cultura popular. A exposición «Colección de favoritas», un proxecto desenvolto especificamente para a Sala de Exposicións do Teatro Afundación de Vigo, presenta unha coidada selección de pezas creadas por Francesch entre 2004 e 2024. Son as súas preferidas de entre todas as súas creacións dos últimos 20 anos. A exposición permanecerá aberta desde hoxe ata o 20 de xullo.

Asegura a comisaria da exposición, a especialista en ilustración contemporánea e xestora cultural Matilde Rodríguez, que o traballo de Héctor Francesch destaca pola súa «formulación gráfica», as linguaxes visuais actuais a partir dos que configura as súas obras, e polo uso de cores planas e liñas definidas. Este enfoque reflicte a súa formación dixital. Pero Héctor Francesch elabora manualmente as súas obras. Esta obstinación polo artesanal, sostén Rodríguez, «outorga un valor engadido ao seu traballo, centrado nos detalles, os acabados, e a constante investigación de materiais e soportes».

Pintura, obxectos cotiáns e materiais sorprendentes

A exposición da Obra Social de ABANCA reúne un total de 37 obras, das que 12 son pinturas e as 25 restantes técnicas moi diversas que mostran a creatividade do autor e a súa investigación continua sobre materiais e soportes. En «Colección de favoritas» atopamos serigrafías, instalacións, videoarte, pintura expandida ou fotografías, ademais de pezas creadas a partir de ferro policromado, ou empregando monopatines como soporte. Tamén forman parte da exposición a súa emblemática peza-obxecto For the love of sugar, realizada con gominolas sobre un modelo de cranio humano ou a instalación Nube de lapis realizada con sedela e lapis de cores. Francesch «desafía a dualidade entre a liberdade creativa e o rigor formal», afirma Matilde Rodríguez, «empregando obxectos cotiáns como base da súa expresión artística».

Imaxes dispoñibles nesta ligazón.

Inauguración

A curadora Matilde Rodríguez participou este martes, xunto ao propio Héctor Francesch e á coordinadora adxunta da área de Cultura e responsable de exposicións de Afundación, Paloma Vela, na presentación da exposición, que se inaugurará ao público esta tarde ás 19 h, cunha visita guiada a cargo de Héctor Francesch e a comisaria da mostra, Matilde Rodríguez. 

A responsable de exposicións de Afundación, Paloma Vela, agradeceu a Héctor Francesch, e a Matilde Rodríguez, o traballo conxunto desenvolvido para poñer ao dispor do público a «Colección de favoritas». «Héctor Francesch é, pola súa traxectoria e pola calidade do seu traballo, un dos principais artistas plásticos de Galicia na actualidade. Achegarnos á súa obra, propiciar o encontro entre estas creacións e a sociedade, e promover o diálogo co sector cultural, alíñase directamente cos obxectivos de Afundación, entre os cales destaca a importancia de desenvolver proxectos de estudo e divulgación de artistas contemporáneos e con novas linguaxes como é o caso de Francesch. É un orgullo poder presentar unha proposta artística tan suxestiva, divertida e profunda como a de Francesch».

Paloma Vela tamén convidou á cidadanía para participar nas visitas guiadas á exposición promovidas por Afundación. Serán ás 19 horas, os días 16 e 23 de maio, previa inscrición.

Unha traxectoria consolidada

Héctor Francesch emprega a palabra «refuxio» para definir o seu traballo. «Grazas a el podo facer que as cousas sexan como a min gústanme». Desde a súa primeira exposición no ano 1998 na Coruña, a súa obra formou parte de múltiples certames, como a IX Mostra Unión Fenosa, o Certame de Artes Plásticas Isaac Díaz Pardo no que a súa obra foi adquirida en varias ocasións. Tamén obtivo o VIII Premio Auditorio de Galicia. Ademais, participou en feiras como ArtMadrid ou Swab Barcelona e exposicións nacionais e internacionais, en Europa e América.  

As creacións de Héctor Francesch forman parte dalgunhas das mellores coleccións de arte de Galicia e de España, entre as que se atopa a Colección de Arte de Afundación, que atesoura obras de Francesch desde hai 19 anos.

«Cultura por alimentos»

A exposición «Colección de favoritas» forma parte da iniciativa solidaria «Cultura por alimentos», que Afundación desenvolve en colaboración coa Federación Española de Bancos de Alimentos. As persoas asistentes poderán deixar produtos non perecedoiros  nos contedores postos ao dispor para ese efecto cando accedan á sala de exposicións.

Programa didáctico para escolares

Co obxectivo de contribuír á divulgación da obra de Hector Francesch, á vez que utilizala para achegar ás escolares ferramentas de STEAM, investigación, arte e educación en valores, Afundación propón un programa didáctico para escolares e colectivos. A obra de Francesch é especialmente interesante para os escolares pola súa linguaxe pictórica próxima á publicidade, ao cinema e á cultura popular, mesturado coa crítica e a retranca. O humor, o lúdico, o xogo e a memoria colectiva teñen moita presenza no seu traballo.