Afundación presenta o ciclo de conferencias «Emilia Pardo Bazán, da novela ao cine» na súa sede da Coruña
18.04.2022. Afundación, a Obra Social de ABANCA, organiza na súa sede da Coruña o ciclo de conferencias «Emilia Pardo Bazán, da novela ao cine», que se desenvolverá entre o 19 e o 21 de abril e no que participarán profesionais tan relevantes das letras e a sétima arte como Lorenzo Silva, José María Paz Gago, Tamara Montero, Manuel Gutiérrez Aragón, Miguel Losada, Marta Otero, Zaza Ceballos, Susana Dans e José Manuel Sande. Cun encontro diario, este foro de coñecemento enmárcase no centenario do pasamento da insigne escritora coruñesa. O formulario de inscrición está dispoñible aquí.
Este evento enmárcase no programa «Cultura por alimentos» dinamizado por Afundación e destinado a vincular a participación en actividades culturais coa solidariedade. Así, a Obra Social ABANCA, en colaboración coa Federación Española de Bancos de Alimentos, co obxectivo de contribuír, a través de doazóns, a incrementar os recursos dos Bancos de Alimentos de Galicia, invita todas as persoas que asistan a que colaboren con esta campaña solidaria acudindo cunha doazón de alimentos non perecedoiros que serán recollidos no propio centro.
CONFERENCIAS
«Emilia Pardo Bazán e a novela negra»
Nunha conferencia moderada por Tamara Montero, un dos maiores especialistas en novela negra, Lorenzo Silva, conversa co catedrático e escritor José María Paz Gago, editor da novela policíaca de Emilia Pardo Bazán Los misterios de Selva, ata agora inédita, sobre as decisivas e temperás achegas da escritora coruñesa a un xénero tan popular e actual.
«Los pazos de Ulloa en televisión»
Cun extraordinario reparto, a versión fílmica da novela naturalista de Pardo Bazán, emitida como serie por TVE, representou todo un fenómeno televisivo nos anos oitenta. O seu guionista, Manuel Gutiérrez Aragón, e o crítico Migue Losada comentarán as vicisitudes daquela rodaxe e as dificultades que representou plasmar na pantalla unha historia tan profundamente galega, nunha charla conducida por Marta Otero.
«La condesa rebelde, dona Emilia no cine»
A través da súa protagonista, Susana Dans (dona Emilia) e da súa directora, Zaza Ceballos, analizaranse os pormenores do telefilme de Emilia Pardo Bazán. La condesa rebelde, extraordinaria versión cinematográfica da súa apaixonante biografía. A partir desta cinta, a espléndida interpretación de Susana Dans quedará no imaxinario dos espectadores como o tipo e o carácter da autora de La Tribuna. A conferencia contará coa moderación de José Manuel Sande.
Toda a información da actividade de Afundación, na nosa SALA DE PRENSA.