Afundación organiza un programa de visitas guiadas para público familiar á exposición «Comedy Wildlife» en Ferrol
Afundación, a Obra Social de ABANCA, organizou un programa de visitas guiadas para público familiar á súa nova exposición na Sede Afundación de Ferrol, «Comedy Wildlife». Serán os días 16 e 30 de maio, ás 19.00 h, e é preciso inscribirse neste formulario.
A comedia da vida salvaxe chega á Sede Afundación de Ferrol. E está contada a través das fotografías que compoñen a exposición homónima, «Comedy Wildlife», de acordo co título do certame do que nace a mostra. As imaxes foron tomadas en distintos recantos dos cinco continentes e todas elas foron distinguidas entre 2015 e 2022 como as mellores instantáneas de animais feitas en clave de diversión e humor no mundo.
«Comedy Wildlife», organizada en colaboración con Terra Espléndida, móstrase agora na Sede Afundación de Ferrol tras encher en 2023 museos e centros de exposicións de Países Baixos, Inglaterra, Portugal ou Canadá, e atraer a máis de 15 000 visitantes no Teatro Afundación de Vigo.
Evitar as mensaxes e as imaxes «deprimentes»
Asegura o cofundador dos premios «The Comedy Wildlife», o tamén fotógrafo especializado en natureza Paul Joynson Hicks, que «as cuestións de conservación e sostibilidade da vida silvestre están gañando impulso a nivel mundial, pero as mensaxes e imaxes tenden a ser negativas, deprimentes e enervantes. E por iso se animou, xunto cos fotógrafos de natureza Tom Sullam e Michelle Wood, a crear estes galardóns. Desde 2015 premian as imaxes máis divertidas de animais tomadas nun mundo extraordinariamente fermoso e interconectado».
«Comedy Wildlife» é unha exposición que cautiva toda a familia ao utilizar o humor e a sorpresa como unha forma efectiva de involucrar ao público co encanto do reino animal. As imaxes son extremadamente populares, atraen todas as idades e transcenden todas as culturas e idiomas. Así, as 60 instantáneas seleccionadas que se presentan en Ferrol mostran, nas posicións e momentos máis divertidos, animais como tartarugas, mapaches, osos, pingüíns ou píllaras.
«Unha foto divertida de animais é incriblemente eficaz porque non hai barreiras para a comprensión, ou tabús que deben ser negociados. A imaxe aproveita o impulso polo antropomorfismo que está ben documentado como unha dos disparadores máis potentes para a empatía humana. Para entender realmente aos animais e as cuestións que lles afectan temos que empatizar con eles como concidadáns do mesmo planeta», subliña Paloma Vela, coordinadora adxunta da área de Cultura de Afundación.