Afundación resolve mañá o XLIII Premio Internacional Afundación de Periodismo Julio Camba

Afundación, a Obra Social de ABANCA, celebrará mañá, martes 15 de novembro a partir das 14.00 h, no Hotel Westin Palace de Madrid, o acto de anuncio da persoa gañadora do XLIII Premio Internacional Afundación de Periodismo Julio Camba, previa deliberación do xurado ás 11.00 h. Ademais da resolución, no marco da conmemoración do 60 aniversario do seu pasamento, Afundación organizou a mostra arredor da súa figura «Julio Camba. O home que non quería ser nada», comisariada por Aser Álvarez, para contextualizar quen se hospedou neste hotel, de forma permanente, entre os anos 1954 e 1962.

O acto contará coa participación de Juan Carlos Escotet, presidente de ABANCA e patrón de Afundación; Miguel Ángel Escotet, presidente de Afundación; Alfredo Conde, presidente do xurado; Cristina Sánchez-Andrade, Bibiana Candia, Ramón Pernas e Gervasio Posadas, vogais do xurado; e Isaac González Toribio, secretario do xurado. Estarán tamén as tres persoas finalistas: Esther Baeza Navarro (Rosa Palo), polo seu artigo «Ex», publicado en todas as cabeceiras rexionais do Grupo Vocento; Manuel de Lorenzo Paradela, por «Límites», en El Progreso; e Alberto Olmos, por «Cuando hasta la nieve nos la tomamos personalmente», en Elconfidencial.com.

O premio, ao que se presentaron 118 artigos publicados entre o 1 de xaneiro e o 31 de decembro de 2021, está dotado con 10 000 €. A persoa galardoada sumarase deste xeito a unha nómina de premiados entre os que se atopan nomes tan relevantes como Gonzalo Fernández de la Mora, Carlos García Bayón, Antonio Odriozola, Rafael Landín, Xesús Ferro Ruibal, Arturo Lezcano Fernández, Torcuato Luca de Tena, Carlos Casares, Juan Manuel de Prada, Diego Bernal, César Casal, Manuel Rivas, Manuel Jabois, Fernando Savater, Andrés Trapiello, Ángeles Caso, Luis Ventoso, Ignacio Camacho, Ramón Loureiro, Miguel Anxo Murado, Ricardo F. Colmenero, Cristina Sánchez Andrade, Luis Pousa ou Bibiana Candia, gañadora da pasada edición.